Sovet qoşunlarının faşistlər üzərində qələbə çalmasında misilsiz rolu olan Həzi Aslanov 1910-cu il yanvarın 22-də Lənkəran şəhərində anadan olub.

İkinci dünya müharibəsi başlananda o, Ukraynada xidmət edib. 1941-ci il iyunun 23-nə keçən gecə alman zirehli qoşunları ilə qeyri bərabər döyüşdə Həzi özünü bacarıqlı sərkərdə kimi göstərib. 1941-ci ilin dekabrında Moskva ətrafında vuruşmalarda qəhrəmanlığına görə Qırmızı Ulduz ordeninə layiq görülüb

Kotelnikovo yaxınlığında gedən döyüşlərdə böyük şücaət göstərən podpolkovnik H.Aslanov 1942–ci il 22 dekabrda Sovet İttifaqı Qəhrəmanı adına layiq görülüb.

Stalinqraddan Baltik sahillərinədək döyüş yolu keçən Həzi Aslanov 24 yanvar 1945–ci ildə Latviyanın Liepay rayonunda alman faşistləri ilə döyüşdə qəhrəmancasına həlak olub.

Həzi Aslanovun qəbri Bakıda Şəhidlər Xiyabanındadır.

Qeyd edək ki, Həzi Aslanov Böyük Vətən müharibəsi cəbhələrində göstərdiyi şəxsi igidlik və qoçaqlığına görə 3 Qırmızı Bayraq ordeni, 2-ci dərəcəli Suvorov ordeni, Aleksandr Nevski ordeni, 1-ci dərəcəli Vətən müharibəsi ordeni, 2 Qırmızı Ulduz ordeni və medallarla təltif olunub.

1944-cü ildə general-mayor H.Aslanov Belorusiya cəbhəsindəki şücaətinə görə ikinci dəfə yüksək ada təqdim edilsə də, SSRİ hərbi rəhbərliyində təmsil olunan erməni generalı İ.Baqramyan buna maneəçilik törədib. Ölümündən 47 il sonra, 1991-ci ildə H.Aslanova ikinci dəfə Sovet İttifaqı Qəhrəmanı adı verilir.

Xatırladaq ki, 1969–cu ildə Həzinin vətəni Lənkəranda onun ev-muzeyi açılaraq 1983–cü il 8 mayda Lənkəran şəhərinin mərkəzində onun boyük heykəli qoyulub.

Bakıdakı küçələrdən və metrostansiyalardan biri Həzi Aslanovun adını daşıyır.








(axar.az)