Bakı Biznes Universitetində "World” Karyera və Peşə Mərkəzinin təşkilatçılığı, Dövlət İmtahan Mərkəzi, Dövlət Məşğulluq Agentliyi və Təhsil Tələbə Kredit Fondunun rəsmi tərəfdaşlığı ilə 4-cü dəfə "TəhsildəSƏN” adlı təhsil forumu keçiriləcəkdir. Adıçəkilən forum #təhsildəkreativSƏN devizi ilə 3 May tarixində təşkil olunacaqdır. Burada 14 spikerin təqdimatında təhsilin müxtəlif sahələrinə aid mövzular müzakirə olunacaq.
"TəhsildəSƏN 4” tədbirinin əsas məqsədi təhsildə uğur qazanmış və təcrübəyə malik olan təhsil işçilərinin spikerliyi ilə forumda iştirak edən müəllim, pedaqoq və təhsil işçilərinin biliklərini artırmaq və aktual təhsil mövzuları ətrafında müzakirə təşkil etməkdir. Müzakirə olunan mövzulara xaricdə təhsil, emosional zəka, qeyri-formal təhsil, xüsusi uşaqlarla iş, disleksiya, imtahan stresi, ixtisas seçimi, fərdi bilik və bacarıqların aşkarlanması,
süni intellekt, xarici dillərin öyrənilməsi və mənimsənilməsi, İB və Kembric təhsil sistemlərinin ölkəmizdə tətbiqi və s. aktual mövzular daxildir.
Qeyd edək ki, "World” Karyera və Peşə Mərkəzi təhsil sektorunda 14 illik təcrübəyə malikdir. Xarici dillərin tədrisi, peşə təhsili, xaricdə təhsil və maarifləndirmə sahəsində çox sayda tədbirlər, görüşlər, təlim və seminarlar təşkil etmişdir. Mərkəz eyni zamanda 2021-ci ildən etibarən təhsil sektorunda fəallığın artırılması və özəl təhsil sektorunda fəaliyyət göstərən təhsil müəssisələrinin xidmətlərini geniş kütlələrə çatdırmaq məqsədilə forumlar və sərgilər təşkil edir. Forumlarda bilik və bacarıqlarını artırmaq istəyən və təhsil sahəsinin təcrübəli mütəxəssislərinin çıxışlarını dinləmək istəyən bağça, məktəb, tədris mərkəzində çalışan müəllimlər, pedaqoqlar, təhsil işçiləri, təlimçilər və özünü təhsildə görən hər kəs iştirak edir.
Forumda iştirak biletlədir və biletləri əldə etmək üçün 055 674 72 30 whatsapp nömrəsinə yazmaq kifayətdir.
Xəbərdən istifadə edərkən istinad etmək vacibdir.
