Sumqayıtda Təhsil Nazirliyinin təşkilatçılığı ilə "Yerli təhsil idarəetmə orqanlarında və təhsil müəssisələrində kargüzarlıq işinin aparılması və vətəndaşların müraciətlərinə baxılması” mövzusunda regional seminar-müşavirə keçirilib.

Seminar–müşavirədə Prezident Administrasiyasının, Təhsil Nazirliyinin rəsmiləri, həmçinin Sumqayıt şəhər, Abşeron, Qubadlı, Şuşa və Zəngilan rayon təhsil müəssisələrinin rəhbərləri iştirak ediblər.

Təhsil Nazirliyinin şöbə müdiri Elnur Əliyev bildirib ki, seminar-müşavirə kargüzarlıq işinin və vətəndaşların müraciətlərinə baxılması vəziyyətinin mövcud qanunvericiliyin tələblərinə uyğun təşkili, təhsil sahəsində çalışan rəhbər və digər işçilərin maarifləndirilməsi məqsədinə xidmət edir.

Tədbirdə Təhsil Nazirliyində, eləcə də təhsil qurumlarında vətəndaşların qəbulunun təkmilləşdirilməsi, məlumatların ümumiləşdirilməsi, qəbula yazılma prosesinin avtomatlaşdırılması ilə bağlı görülmüş işlər barədə məlumat verilib.

Həmçinin cari ildə 146 "Qaynar xətt” Telefon Məlumat Mərkəzinə daxil olan zənglər və Qəbul Mərkəzində vətəndaşlara göstərilən xidmətlərlə bağlı statistika nəzərə çatdırılıb.

Sonra Prezident Administrasiyasının məsul əməkdaşı İsmayıl Yaqubov qeyd edib ki, idarəetmənin təşkilində sənədlərlə işin düzgün qurulması, müasir texnologiyalardan istifadə vacib məsələlərdən biridir. Qeyd olunub ki, bu sahədə qanunvericilik aktlarına müntəzəm olaraq əlavə və dəyişikliklər edilməklə, normativ hüquqi baza müasirləşdirilir.

Təhsil Nazirliyinin əməkdaşı Elmir Həsənov çıxışında vurğulayıb ki, kargüzarlıq özündə sənədlərin hazırlanması, istifadə edilməsi, qəbulu, qeyd edilməsi, icraçılara çatdırılması, icrasına nəzarətin təşkili, onların çoxaldılması, göndərilməsi, verilməsi, müəyyən fəaliyyət üzrə sənədlər çoxluğundan ibarət olmaqla, habelə işlənilmiş sənədlərin arxivdə saxlanması prosesini özündə birləşdirir.

Sonda seminar-müşavirə iştirakçılarını maraqlandıran suallar ətraflı cavablandırılıb.

Tədbir diskussiya şəklində davam edib.