"Rabitə və Yüksək Texnologiyalar Nazirliyinin Məlumat Hesablama Mərkəzi” tərəfindən Bakı Slavyan Universitetinin "İnnovasiya və Texnologiya üzrə rektor müşavirliyi xidməti”-nin üzvü olan tələbələr üçün "Elektron Hökumət və gənclər” movzusunda seminar təşkil olundu. Universitetin konfrans zalında baş tutan seminarda məqsəd gənclərə "Elektron Hökumət", elektron xidmətlər, elektron imza, e-sənəd və digər İKT yenilikləri barədə ətraflı informasiya vermək və tələbələrdə "Elektron Hökumətlə” bağlı praktiki biliklər formalaşdırmaqdır.
Bu məqsədlə hazırlanmış prezentasiya ilə "Elektron Hökumət” portalının mütəxəssisləri seminarı açıq elan etdi və seminara interaktiv dialoq şəklində start verildi. Məruzəçilər "Elektron Hökumət”in infrastrukturu, əsas komponentləri, e-xidmətlər, dövlət reyestrləri və açıq hökumət məlumatları ilə yanaşı "Elektron Hökumət"in yaradılmasını zəruri edən amillərdən, onun hüquqi əsasından bəhs etdilər, "Elektron hökumət” portalı üzərindən təqdim olunan e-xidmətlər barədə ətraflı məlumat verdilər. "Elektron arayışlar”, "Elektron ödənişlər”, "Əks əlaqə”, "Onlayn konsultasiya”, "Fikir bankı” və portalda yaradılmış digər funksionallıqlar və servislər barədə iştirakçılara geniş məlumat verildi. "Elektron Hökumət” portalının bu yaxında istifadəyə verilmiş yeni versiyasının üstünlüklərindən, daha sadə və daha istifadəçiyönümlü olmasından bəhs edildi. Bununla yanaşı 20-yə yaxın ən aktual elektron xidmətlərlə yeni istifadəyə verilmiş mobil versiya barədə tələbələrə ətraflı məlumat verildi.
Bununla yanaşı məruzəçilər vətəndaşlar tərəfindən daha çox istifadə olunan "Elektron arayışlar” barədə də tələbələrə geniş məlumat verdilər. Qeyd etdildi ki, elektron arayışlar daha çox sosial tələbat olan və portalda ən çox istifadə olunan xidmətlərdəndir və hazırda "Elektron Hökumət” portalı vasitəsilə vətəndaşlara 11 növdə e-arayışlar təqdim edilir. Gələcəkdə e-arayışların əhatə dairəsinin daha da genişləndirilməsi nəzərdə tutulur. Sonra isə məruzəçilər portal üzərindən təqdim olunan elektron xidmətlərdən məhz gənclər üçün nəzərdə tutulmuş və daha çox istifadə olunan elektron xidmətləri real rejimdə test edilərək nümayiş etdirildi.
Seminar tələbələrlə sual-cavab və müzakirələrlə davam etdi. Seminarda aktiv iştirak edən tələbələrə e-imza sertifikatları, kart oxuyucular və portalda qeydiyyatdan keçmək üçün kod/parollar təqdim olundu.
Xəbərdən istifadə edərkən istinad etmək vacibdir.
