Sumqayıt şəhər 28 nömrəli tam orta məktəbin akt zalında Azərbaycan Respublikasının Prezidenti yanında Bilik Fondunun xətti ilə mühazirə təşkil olunmuşdur. Mühazirəyə Sumqayıt şəhərinin 24 və 28 nömrəli ümumtəhsil məktəblərinin yuxarı sinif şagirdləri dəvət edilmişdir. 28 nömrəli məktəbin direktoru Mehdi Ağayev tədbirdə iştirak edən dinləyicilərə Sumqayıt Şəhər Təhsil Şöbəsinin metodisti, Bilik Fondunun mühazirəçisi Əlhəddin Paşayev haqqında ətraflı məlumat vermiş və onu dinləyicilərə təqdim etmişdir. Mühazirəçi "Şagirdlərin vətənpərvərlik tərbiyəsində məktəbin rolu” mövzusunda təqdimatla çıxış etməklə bərabər mühazirə söyləmişdir. Əlhəddin Paşayev öz mühazirəsi ilə bağlı belə qeyd etmişdir:
— "Müasir dövrdə Azərbaycan təhsilinin ən böyük vəzifəsi müstəqil düşünüb, müstəqil nəticə çıxaran və vətənini sevən Azərbaycan vətəndaşı yetişdirməkdir. Bu gün məktəblərimizdə təhsil alan şagirdlərin vətənpərvər və hərtərəfli inkişaf etmiş bir şəxsiyyət kimi formalaşmasında ailə ilə yanaşı, təhsil işçilərinin də üzərinə çox məsuluyyətli vəzifələr düşür. Bu məsuliyyət xüsusilə də kurikulum islahatının həyata keçirildiyi bir zamanda bütün fənləri tədris edən müəllimlərimizin üzərinə düşür. Məhz hər bir müəllim təlimin optimal forma və yollarından istifadə edərək şagirdləri milli-mənəvi dəyərlər və vətənpərvərlik ruhunda tərbiyə etməyə çalışır.
Ümummilli Lider Heydər Əliyevin vətənpərvərlik haqqında dediyi tarixi fikirlər müəllimlər tərəfindən izah edilərək şagirdlərə ətraflı çatdırılır. Məktəblərdə bu istiqamətdə aparılan işləri hər bir müəllim özünə əsas vəzifə kimi hesab edir. Həmçinin məktəblərdə çalışan bütün müəllimlər şagirdlərin formalaşmasında vətənpərvərlik tərbiyəsi və onlarda vətənpərvər hisslərin artırılması üçün görkəmli-tarixi şəxsiyyətlərin böyük rol oynadığının vacibliyini qeyd edir.
Azərbaycan Respublikasının ümumtəhsil məktəblərində vətənpərvərlik tərbiyəsinin aşağıdakı əsas tərkib hissələrinə önəm verilir:
1) Vətənin müdafiəsinə daim hazır olmaq;
2) Azərbaycan dövlətinin müstəqilliyinin daimiliyinə inam;
3) Azərbaycan xalqının milli ideologiyasına sədaqət;
4) Milli dəyərlərə hörmət, öz ana dilini yaxşı bilərək onun nəsillərə yüksək səviyyədə ötürülməsinə çalışmaq;
5) Millətin layiqli nümayəndəsi olmaq üçün yüksək intelektual səviyyəyə malik olmaq;
6) Dahi şəxsiyyətlərin fikirlərinə istinad etmək.
Azərbaycan Respublikası müstəqillik qazanandan sonra onun ictimai-humanitar silsiləli fənləri xüsusilə, ədəbiyyat və tarix köklü şəkildə yeniləşərək təkmilləşir. Xüsusilə də Azərbaycan şifahi xalq ədəbiyyatı nümunələrindən laylalar və oxşamalar, əfsanələr, tapmacalar, nağıllar öyrədilərkən şagirdlərdə milli vətənpərvərliyimiz və vətənə sevgi daha dərindən aşılanır.
Cəbhədə baş verən hadisələrdən və Azərbaycan Ordusunun uğurundan söz açaraq Ali Baş komandan, prezident cənab İlham Əliyevin qətiyyətli siyasətinin xalqımız tərəfindən bir mənalı şəkildə dəstəkləndiyini bir çox təhsil işçiləri tərəfindən siniflərdə vurğulanaraq şagirdlərin nəzərinə çatdırılır.
Qədim əcdadlarımız torpağı, suyu, odu, göyü, işığı, çörəyi, südü, duzu müqəddəs hesab etmişlər. Onların şərəfinə, müqəddəsliyinə nəğmələr, şeirlər qoşmuş və andlar içmişlər. "Yer haqqı”, "su haqqı”, "işıq haqqı”, "çörək haqqı”, "duz haqqı”, "ocaq haqqı”, "anamın südü haqqı” və s. Bu müqəddəslik tədris müəssisələrində şagirdlərimizə də aşılanır, belə sözlər onlarda vətənpərvərlik, vətənə sevgi və məhəbbət hissi yaradır. Odur ki, şagirdlərin vətənpərvərlik tərbiyəsi ruhunda formalaşması istiqamətində mühüm işlərin aparılması üçün məktəbdə çalışan hər bir müəllim öz işini günün tələbləri səviyyəsində qurur. Bu zaman müəllim vətənpərvərlik, xeyirxahlıq, ədalətlilik, dostluq, çalışqanlıq, səbrlilik, övlad tərbiyəsi, əməksevərlik, saf məhəbbət, musiqiyə qiymət, dövlətçilik və s. kimi milli-mənəvi dəyərlərimizin müəyyən komponentlərini şagirdlərə çatdırır”.
Təşkilatçılıq işinin yüksək səviyyədə baş tutması sayəsində mühazirəçi öz çıxışını günün tələbinə uyğun səviyyədə qura bilmiş və mövzuya dair ayrı-ayrı məqamları dinləyicilərə çatdırmış; mühazirə, müəllimlər tərəfindən diqqətlə dinlənilmişdir.
Tədbir iştirakçıları Bilik Fondunun maarifçilik fəaliyyətini yüksək qiymətləndirməklə yanaşı, belə mühazirələrin tez-tez təşkil olunmasının tərəfdarı olduqlarını bildirmişlər.
Xeberle.com
Xəbərdən istifadə edərkən istinad etmək vacibdir.
