Sumqayıtda Gənclər və İdman Baş İdarəsi və Təhsil şöbəsinin birgə təşkilatçılığı ilə Heydər Əliyev Mərkəzində "9 noyabr – Dövlət Bayrağı və 12 noyabr–Konstitusiya günü”nə həsr edilmiş test müsabiqəsi keçirilib.

Xeberle.com-a verilən məlumata görə, bilik yarışında çıxış edən Təhsil şöbəsinin Metodiki kabinetinin müdiri Gülbahar Haqverdiyeva, Baş İdarənin Gənclərlə iş sektorunun müdiri Ceyhun Hüseynov iştirakçıları salamlayaraq, Dövlət Bayrağı və Konstitusiyamızın yaranma tarixindən danışıb, qarşıdan gələn 17 noyabr-Milli Dirçəliş günü münasibətilə iştirakçıları təbrik ediblər. Çempionatın məqsədi "Azərbaycan gəncliyi 2017-2021-ci illərdə” Dövlət Proqramından irəli gələn vəzifələri icra etmək, məktəblilər arasında dövlət rəmzlərini təbliğ etmək, vətənpərvərlik və vətəndaşlıq tərbiyəsi işini gücləndirmək, onların hüquqi maarifləndirilməsi, intelektual səviyyəsini, dünya görüşünü, zehni inkişafını stimullaşdırmaq, onlar arasında elmin nüfuzunu artırmaq, asudə vaxtlarının səmərəli təşkili istiqamətində yeni üsullar tətbiq etməkdir. Müsabiqədə şəhərin 47 orta ümumtəhsil məktəbin IX-XI sinif şagirdləri öz bilik və bacarıqlarını sınayıblar. Gərgin şəraitdə keçən bilik yarışının sonunda I yerə1 saylı orta məktəbin şagirdi Nurlan Rəcəbov, II yerə 2 saylı orta məktəbin şagirdi Uğur İlyaslı, 21 saylı orta məktəbin şagirdi Sona Abdullayeva, III yerə 19 saylı orta məktəbin şagirdi Xanım Mirzəyeva, 10 saylı orta məktəbin şagirdi Zinyət Paşazadə və 5 saylı orta məktəbin şagirdi Həsrətəli Mircəfərov layiq görülüblər.

Qaliblərə Baş İdarənin fəxri fərman və hədiyyələri, həmçinin hər bir iştirakçıya Konstitusiya kitabı təqdim edilib.