Bir müddət əvvəl Zaqatalanın 3-cü Tala kənd orta məktəbinin coğrafiya müəllimi Ehtiram Safquliyevin fərqli metodla keçdiyi dərs hər kəs tərəfindən rəğbətlə qarşılanıb. Videoda şagirdlər iki sıra düzülür, müəllim də onlara suallar verir. Cavabı daha tez tapan bir komandaya, digəri isə başqa komandaya keçir. Sual-cavab şəklində qurulan yarışda hər uşaq fərdi olaraq yarışır və qalib gələn şagird hər hansı bir mükafat və ya şagirdlərin alqışları ilə qarşılanır.

Xeberle.com videoda maraqlı dərsi keçən müəllimlə müsahibəni təqdim edir.

Haşiyə:Safquliyev Ehtiram Nadir oğlu 1993-cü il noyabr ayının 3-də Zaqatala rayonu Muğanlı kəndində anadan olub. 2001-ci ildə Muğanlı kənd tam orta məktəbinə daxil olan Ehtiram 2011-ci orta məktəbi qurtarıb. Elə həmin il TQDK-ın ali məktəblərə keçirdiyi qəbul imtahanında 508 bal toplayaraq Bakı Dövlət Universitetinin Coğrafiya Fakültəsinin Coğrafiya Müəllimliyi ixtisasına qəbul olub oxuduqdan sonra 2015-ci ildə hərbi xidmətə yollanıb. Hərbi xidmətdən sonra 2017-ci ilin avqust ayında Azərbaycan Respublikası TN-in keçirdiyi MİQ imtahanından 52 bal toplayaraq Zaqatala rayonu Üçüncü Tala kənd tam orta məktəbində işləmək hüququ qazanıb. Artıq 3 aydır ki, məktəbin coğrafiya müəllimi kimi çalışır.

- Necə oldu ki, Zaqatala kənd orta məktəbində dərs keçmək qərarına gəldiniz?

- Topladığım bal mənə Respublikanın istənilən bölgəsində işləmək üçün şans yaratmışdı. Lakin mən Zaqatalanı seçdim. Çünki, mən cismən və ruhən bu yerlərə bağlıyam. Fikirləşirdim ki, mənə bizim rayonda ehtiyac var. Mən bu rayona hər hansı bir işimlə töhfə verə biləcəyimi düşünürdüm. Buna görə də Zaqatalanı seçmək qərarına gəldim.

- Əksəriyyət insanlar elə düşünür ki, şəhərdən fərqli olaraq rayon və kəndlərdə təhsil aşağı səviyyədədir. Bu barədə nə deyə bilərsiniz?

- Bəli, bu doğrudur. Kənd yerlərində təhsil alan insanların təhsil səviyyəsi aşağıdır. Çünki, kənd yerlərində problemlər çoxdur. Qaz xəttinin olmaması, internetə çıxışın zəif olması və ya olmaması, yeniliklərdən gec xəbər tutulması, maddi vəziyyətin aşağı olması təhsil səviyyəsinə təsir göstərir.

- Videoya alınan dərsin sayəsində bir neçə günə internet fenomeninə çevrildiniz. Bu cür dərsləri tez-tez keçirirsinizmi?

- Daim çalışıram ki, dərslərimdə fərqlilik olsun və şagirdlərim bezməsin. Maraqlı dərslər, oyun-dərslər onları cəlb edir. Həmin videodakı üsuldan az-az istifadə edirəm. Bu ayda 2 dəfə, 3 dəfə ola bilər. Çalışıram ki,onlar bezməsin. Bu tədris üsulu nə qədər maraqlı olsa bele tez-tez istifadə etsəm şagirdlərin xoşuna gəlməyə bilər.

- Dərsə maraq yaratmaq üçün başqa hansı vasitələrdən istifadə edirsiniz?

- Dərsə maraq yaratmaq üçün hərdən hədiyyəli yarışmalar keçirdirəm. Bu üsul da şagirdləri dərsə cəlb edir. Hərdən dərsdə mövzumuza aid maraqlı videolara baxırıq. İki aydan bir isə siniflər arasında Coğrafiya fənnindən viktorina keçirdirəm. Bu üsul da effektlidir.

- Dərs keçdiyiniz uşaqlardan gələcəyin coğrafiya müəllimi kimi yetişmək istəyənlər varmı?

- Hal-hazırda bunu açıq şəkildə bildirən olmayıb. 7-ci siniflərimin hiss edirəm ki, Coğrafiyaya böyük maraqları var. Əminəm ki, gələcəkdə onların arasında Coğrafiya müəllimi kimi yetişmək istəyənlər olacaqdır.

- Müəllimin necə olması ilə bağlı müxtəlif fikirlər var. Sizcə əsl müəllim necə olmalıdır?

- Azərbaycan müəllimini gülərüz, sadə, təvəzökar, danışığı, hərəkətləri, savadı ilə başqalarına nümunə olacaq biri kimi görmək istərdim. Müəllimi hər zaman axtarışda olan, yenilikləri tapıb ortaya çıxaran, şagirdlərini doğru düzgün yola istiqamətləndirən birisi olmalıdır. O təkcə elm deyil, həyatı öyrətməyi bacarmalıdır.

- Gələcək planlarınız nələrdir?

- Gələcəkdə direktor olmaq və daha da irəli gedərək Zaqatala təhsilinə töhfələr vermək istəyirəm.

- Maraqlıdır, məktəbdən kənar vaxtınızı necə keçirirsiniz?

- Mənim məktəbdən kənar vaxtımın çox hissəsi evlə bağlıdır. Boş vaxtlarımda evdə valideynlərimə kömək edirəm. Bilirsiniz ki, kənd yerlərində iş çox olur (gülür). Hərdən elmi kitablar oxuyuram. Həmçinin təhsilimizin, ölkəmizin həyatında baş verə yeni hadisələrdən xəbər tutmaq üçün interneti izləyərək, yeni üsullar axtarmağa çalışıram.

Hicranə İsmayılova

Xeberle.com

Xəbərdən istifadə edərkən istinad etmək vacibdir.