Sumqayıt ictimaiyyətinə, şəhərin təhsil sisteminə ağır itki üz verib. Şəhərin ən qocaman müəllimlərindən olan Böyükxanım Babayeva fevralın 26-da, ömrünün 92-ci ilində həyatdan köçüb.

1922-ci ildə Bakıda dünyaya gəlmiş Böyükxanım müəllimə Azərbaycan Dövlət Pedaqoji İnstitutu bitirdikdən sonra o zamanlar yeni salınmaqda olan Sumqayıtın ilk müəllimlərindən olmuş, 17 il Corat kənd məktəbində, 45 ilə yaxın isə şəhərin 15 №-li orta məktəbində Azərbaycan dili və ədəbiyyatını tədris edib. Uzun illər səmərəli pedaqoji fəaliyyət göstərmiş Böyükxanım müəllimə həm şagirdlərinin, həm də müəllim yoldaşlarının dərin hörmət və rəğbətini qazanıb. Onun minlərlə yetirmələri arasında indi respublikamızın müxtəlif sahələrində uğurla çalışan çoxlu sayda mühəndislər, həkimlər, hərbçilər, musiqiçilər, tarixçilər və onun sənətini sevərək, ardıcılı olan müəllimlər, ədəbiyyatçılar vardır.

60 ildən artıq Sumqayıtın təhsil sistemində fədakarlıqla çalışmasına, şəhərin ən qabaqcıl, nüfuzlu müəllimlərindən olmasına baxmayaraq, təəssüflər ki, gərgin, çoxillik fəaliyyəti yalnız fəxri-fərmanlarla, mükafatlarla qiymətləndirilib, istedadı və zəhməti ilə layiq olduğu “Əməkdar müəllim” adı isə nədənsə ona verilməyib. Ancaq bütün şagirdlərinin və müəllim kollektivlərinin sevimlisi olub, Sumqayıtda böyük nüfuz qazanmış Böyükxanım müəllimə yaddaşlarda sözün əsl mənasında böyük müəllim, zəhmətkeş, əməkdar pedaqoq kimi yaşayacaqdır.

Allah rəhmət eləsin, qəbri nurla dolsun!

Bütün şagirdləri adından  

Rəhman Orxan.

 P.S.  Böyükxanım müəlliməni sonuncu dəfə ötən ilin oktyabrın 9-da Prezident seçkisi günü “Xeberle.com” görüntüləmişdi. 

Həmin videonu da sizlərə təqdim edirik.