Ali təhsil müəssisələrinin və AMEA-nın magistraturalarına fevralın 23-də keçirilmiş qəbul imtahanının nəticələri elan edilib. İmtahanının nəticələrinə görə Bakı Ali Neft Məktəbinin (BANM) tələbəsi ölkə birincisi olub. BANM-nin Neft-Qaz mühəndisliyi ixtisasının V kurs tələbəsi sumqayıtlı Seymur Rəhimov qəbul imtahanında ən yüksək nəticə (95 bal) toplayıb. Seymur Rəhimov imtahanla bağlı təəssüratını bölüşüb: "İmtahan verdikdən sonra ikinci olacağımı proqnozlaşdırırdım. Amma birinci olmaq mənim üçün də sürpriz oldu. Ölkə birincisi olmaq qürurvericidir. Effektiv çalışaraq qısa müddətdə yüksək nəticəyə nail olmaq mümkündür. İmtahan üçün daha çox bilmədiyim mövzulardan hazırlaşdım. Bildiyim mövzulara vaxt sərf etmədim. Digər tələbələr adətən bütün proqrama diqqət yetirirlər. Mən belə etmədim. İmtahan üçün sadəcə, 2 ay hazırlaşdım".
Seymurun magistratura, ümumiyyətlə, başqa pilləli imtahanlarda iştirak edəcək şəxslərə tövsiyəsi də konkret olub: "Magistratura imtahanına hazırlaşan digər tələbələrə məsləhətim odur ki, bildikləri mövzular üzərində çox vaxt itirməsinlər. Digərlərinə fokuslansınlar”.

Məlumat üçün bildirək ki, Seymur Rəhimov 2004-cü ildə 28 saylı tam orta məktəbdə ibtidai sinifində təhsilə başlayıb. 2011ci ildən isə orta təhsilini 24 nömrəli məktəbdə davam etdirib. Seymur Rəhimov 2013-cü ildə Azərbaycan Respublikası Gənclər və İdman Nazirliyinin təşəbbüsü ilə həyata keçirilən "İstedadların Hazırlığı Laboratoriyası" adlı olimpiadanın respublika turunda 3-cü, 2014-cü ildə isə 2-ci yerə layiq görülüb. O, Bakı Ali Neft Məktəbinin bakalvr pilləsinə 2015-ci ildə 678 balla qəbul olub.

 

Xəbərdən istifadə edərkən istinad etmək vacibdir.