Ötən il "Sumqayıt Yüksək Gərginlikli Elektrik Şəbəkəsi”nin (YGEŞ) balans mənsubiyyətinə aid olan bir neçə yarımstansiyasında (YS) transformatorların daha güclüləri ilə əvəz edilməsi nəticəsində YS-lərin yükgötürmə imkanı artırılmışdır. Belə ki, 110 kV-lik "Ceyranbatan” YS-də 2 saylı 40 MVA gücündə transformator 63 MVA-lıqla əvəz edilmiş, YS-də yeni quraşdırılmış akkumulyator qurğusu idarəetmə qurğusuna, sözügedən gərginlikli 2-ci bölmə isə yenidən qurularaq işə qoşulmuşdur. Eyni zamanda burada 35/6 kV-lik yeni qapalı paylayıcı quruluş (QPQ) tikilmiş, 35 kV-lik 13 ədəd yeni eleqaz yuvaları və kabel kanalı quraşdırılmışdır. 110 kV-lik "Əliağa Vahid” YS-də isə 1 saylı 10 MVA-lıq transformator 25 MVA gücündə transformatorla, "Masazır” YS-də 1 saylı 25 MVA gücündə transformator 40 MVA-lıqla əvəz edilmiş, 2Xəzri” yarımstansiyasında isə 10 MVA gücündə transformator quraşdırılmışdır.
Qeyd edək ki, "Əliağa Vahid” YS-də transformatorun dəyişdirilməsi ilə yanaşı cərəyan transformatoru da gaha güclüsü ilə əvəzlənmiş və YS-də müxtəlif təyinatlı təmir işləri də həyata keçirilmişdir. "Xəzri” YS-də isə yağ açarı eleqaz açarla əvəz edilmiş, 10 kV-lik 1-ci bölmədə əsaslı təmir işləri aparılmış və bölmə istismara verilmişdir.
Qurumdan Xeberle.com-a bildiriblər ki, yarımstansiya xidmətinin işçiləri tərəfindən digər bir neçə yarımstansiyada da müxtəlif gücdə olan transformatorlar və onların avadanlıqları təmir edilərək saz vəziyyətə gətirilmişdir.
Eyni zamanda, müəssisənin balans mənsubiyyətinə aid olan yarımstansiyalarda yanğınsöndürmə vasitələri, habelə su, köpüklə təchizat məsələlərinə baxılmış, köpüklərdən analiz verilərək onların yararlı olması təsdiqlənmişdir. Müvafiq yerlər lazımi ləvazimatlarla təmin olunmuş, ərazi quru otlardan və yanğın törədə biləcək tullantılardan təmizlənmişdir.