Bir müddət əvvəl AzTV-də ciddi ixtisarların olacağını facebook profilimdə yazmışdım: Yeni təyin olunmuş baş proqram direktoru Elsevər Dünyamalıyev göstəriş verib ki, hər redaksiyadan 50% işçilər ixtisar olunsun. Həmçinin yerdə qalan işçilərin maaşlarından 50-80 manat arası pul tutulsun. Ortaya sual çıxır, bəs yaxşı, bu işçilər lazım deyildisə,  nəyə görə işə götürülüb. Əgər lazımdırsa,  niyə işdən çıxarılır?

Bir müddət keçəndən sonra AzTV-nin mətbuat xidmətinin rəhbəri Xatirə Qasımova problemlə əlaqədar mətbuata açıqlama verməkdən imtina edir və yalnız bu fikirləri söyləyir: "Birincisi, həmin məlumatı yayan adam xeyli müddətdir ki, bizdə çalışmır. Digər tərəfdən bu, daxili işimizdir. Bu məsələ ilə bağlı mətbuata şərh vermirik”. Xatirə xanımı narahat etmək üçün media nümayəndələrinə daha bir fürsət. Bu gün televiziyanın bədii rəhbəri Etibar Babayev, televiziyada tanınmış rejissor Elnur Məmmədov və "Səhər” musiqili informasiya proqramının baş rejissoru Rəsul Ələkbərov işdən kənarlaşdırılıb. Bu hadisənin nə üçün baş verdiyi hələ ki,  məlum deyil. Qeyd edək ki, bu şəxslər televiziyada ən çox maaş alan işçilərdir. Birdən-birə televizyadan bu üç önəmli şəxsin çıxarılması bir daha sübut edir ki AzTV-də ciddi problemlər var. Problemlərin kökündə isə zəif idarəetmə durur. Əgər belə davam edərsə, yaxın zamanda televiziyada ciddi narazılar ordusunun yaranacağı şübhəsizdir. Artıq bunun ilkin fəsadları özünü büruzə verir.

Kamal Almuradlı