Bu günlərdə sosial şəbəkələrdə və bir qisim saytlarda Sumqayıt şəhər sakini Zəhra Əfəndizadənin doğmalarının "Doktor AZ” klinikasından şikayətçi olduqları barədə məlumatlar yayılıb. Bildirilib ki, iyunun 2-də Zəhra mədə-bağırsaq nahiyəsində narahatlıq hiss etdikdən sonra anası "Doktor AZ” klinikasına gətirib və müayinə, müalicə olunub. Uşağın valideynləri sırf həkim səhlənkarlığı ucbatından övladlarının sağlamlığına ciddi ziyan vurulduğunu, hətta ölümlə üzləşdiyini iddia ediblər.
Məsələyə aydınlıq gətirmək üçün "Doktor AZ” klinikası ilə əlaqə saxladıq. Klinikadan Xeberle.com saytına verilən cavabı olduğu kimi təqdim edirik.
"02.06.2023-cü il tarixində xəstə 2004-cü il təvəllüdlü Zəhra Əfəndizadə FQDS, Kolonoskopiya müayinəsi üçün "Doktor AZ” klinikasına müraciət etmişdir. Müayinə üçün lazım olan prosedur qaydalar lazımi səviyyədə aparılmışdır. Xəstəyə EKQ olunmuş, kardiomonitor vasitəsi ilə hemodinamikası və saturasiyası yoxlanmış, anamnez toplanmış və çəkisi ölçülmüşdür. Hər hansı əks göstəriş olmadığından xəstənin hər kiloqram çəkisinə uyğun doza seçilərək Propofol sedasiyası aparılmış, həmçinin FQDS, kolonoskopiya müayinəsi həyata keçirilmişdir. Sedasiya və Endoskopik müayinə fəsadsız olmuşdur. Xəstə 10 dəqiqə müddətində tam ayılmış, 40 dəqiqə müddətinə kimi qastroentroloq-həkimlə müayinənin nəticəsini və müalicə tövsiyələrini dinləmişdir. Sonra isə özünü normal hiss etdiyi üçün şəxsi təkidi ilə evə buraxılmışdır.Klinika daxilində xəstədə nəinki koma, anafilaktik şok və ya anafilaktik reaksiya, hətta diskomfort hal belə müşahidə olunmamışdır.Beləliklə,hadisə ilə bağlı bəzi saytlarda və sosial şəbəkələrdə yazılanlar ağ yalandır.
Bundan başqa, pasiyentimizin yaxınları onu Bakı şəhərindəki "Mərkəzi Klinika”, həmçinin təyyarə ilə apararaq İstanbul şəhərindəki "Medikal Park” xəstəxanasında yoxladıblar. Bu tibb müəssisələrində təyin olunan müayinə və müalicə nəticələri epikriz şəklində onun yaxınları tərəfindən bizə təqdim olunmuşdur. Xəstə yaxınlarının bizə və sosial şəbəkələrdə dedikləri ağırlaşmalar (koma, təzyiqin sıfıra düşməsi, ürək damarlarının tutulması və s.) epikrizlərdə və həkimlərin rəylərində öz əksini tapmamışdır. Belə ki, nə "Mərkəzi Klinika”nın, nə də "İstanbul Medikal Park” xəstəxanasının sənədlərində baş verənlərin səbəbi kimi həkim səhvi və ya yanlış keçirilən prosedurlar göstərilməyib.
Hazırda iş müvafiq tibbi sənədlərlə Sumqayıt Şəhər Prokurorluğunda araşdırılır, inanırıq ki, ədalətli qərar veriləcək.
Son olaraq, əldə etdiyimiz məlumata görə Zəhra Əfəndizadə bu günlərdə 1-ci kursunu bitirdiyi Dövlət Neft və Sənaye Universitetində yay imtahanlarını verib. Zəhra balamıza növbəti imtahanlarında və şəxsi həyatında uğurlar, möhkəm cansağlığı arzulayırıq”.
Xeberle.com saytı olaraq qarşı tərəfin mövqeyini də işıqlandırmağa hazırıq.
Xəbərdən istifadə edərkən istinad etmək vacibdir.
