"Qərbi Azərbaycan İcması” Sumqayıt şəhər nümayəndəliyi "Zəfər Günü” münasibəti ilə "Sənin adınla bağlı bu xalqın hər zəfəri” mövzusunda tədbir keçirib.
Xeberle.com xəbər verir ki, QAİ Sumqayıt nümayəndəliyinin təşkil etdiyi görüşdə müxtəlif sahələrdə çalışan Qərbi Azərbaycan kökənli şəxslərlə yanaşı, Sumqayıt şəhər İcra Hakimiyyətinin birinci müavini Teymur Səmədov, "Qərbi Azərbaycan İcması”nın sədr müavini, deputat Hikmət Babaoğlu, İcmanın Qadınlar Şurasının sədri, deputat Məlahət İbrahimqızı, İcmanın Gənclərlə iş təşkilatının üzvü deputat Emin Hacıyev, İcmanın Qəyyumlar Şurasının üzvü Nizami İsgəndərov, Yeni Azərbaycan Partiyası Sumqayıt şəhər təşkilatının sədri Ramiz Hüseynov, Hacı Zeynalabdin qəsəbə nümayəndəsi Lalə Hacıyeva və Sumqayıt Tibb Mərkəzinin direktoru Səkinə Sadıxova digərləri iştirak ediblər.
Tədbir iştirakçıları əvvəlcə Sumqayıt şəhərində Ulu Öndər Heydər Əliyevin adına ucaldılmış abidəni ziyarət ediblər.
Sonra Yeni Azərbaycan Partiyası Sumqayıt şəhər təşkilatının akt zalında davam edən yığıncaqda Azərbaycanın ərazi bütövlüyü uğrunda canlarını qurban vermiş şəhidlərimizin ruhu bir dəqiqəlik sükutla yad edilib, Azərbaycanın dövlət himni səsləndirilib.
İcmanın Sumqayıt nümayəndəliyinin rəhbəri Ramiz İsmayılov tədbiri açıq elan edərək, giriş nitqi ilə çıxış edib. O, Zəfərə gedən yolun başlanğıcının məhz Heydər Əliyev tərəfindən qoyulduğunu, bu gün isə Azərbaycan Prezidenti cənab İlham Əliyevin qətiyyəti nəticəsində məntiqi sonluqla yekunlaşdığını deyərək, əlavə edib ki, Ali Baş Komandanın iradəsi və müdrik siyasəti sayəsində biz qərbi azərbaycanlılar da mütləq öz ata-baba yurdlarımıza qayıdacağıq. Çünki, ortada güclü liderin, dönməz və sarsılmaz siyasi iradəsi var.
Çıxış edən digər natiqlər, o cümlədən YAP Sumqayıt şəhər təşkilatının sədri Ramiz Hüseynov, deputat Hikmət Babaoğlu, deputat Məlahət İbrahimqızı, deputat Emin Hacıyev, icma üzvü, ağsaqqal Sevindik Hüseynov, Sumqayıt şəhər İcra Hakimiyyətinin əməkdaşı Fərman Kazımov, gənc yazar Şah Selim Türkay və hər zaman ürəyi vətən həsrəti ilə alışıb-yanan İcmanın Ağsaqqallar şurasının üzvü, şair Əvəz Mahmud Lələdağ tədbirin əhəmiyyəti barədə danışaraq, gedilən yolda hər kəsə uğurlar arzulayıblar.
Xəbərdən istifadə edərkən istinad etmək vacibdir.
