Ziyafət Hüseynova: "Köçəri Qasımov Füzuli rayonundan qeydiyyatdan çıxdığı üçün ona verilən yardım dayandırılıb"

Füzuli rayonundan məcburi köçkün düşmüş Köçəri Qasımov 7 ildir ki, ona verilən çörək pulundan məhrum olub. Əvvəllər məcburi köçkün olduğu üçün ona hər ay maddi yardım edilib. Amma bir neçə ildir bu mümkünsüzləşib. Heç bir yerdə işləməyən müsahibim indi qohumlarının ümüdünə qalıb.

K. Qasimov deyir ki, əvvəllər aldığı pulla özünü dolandıra bilirdi. İndi Sumqayıt şəhərində 1 saylı yataqxanada yaşayan K. Qasimov məsələ ilə əlaqədar dəfələrlə müvafiq orqanlara müraciət etsə də, onun şikayətinə baxan olmayıb.

Məsələni aydınlaşdırmaq üçün Füzuli şəhər icra nümayəndəliyinə yollandıq. İcra nümayəndəsinin müavini Ziyafət Hüseynova təsdiq etdi ki, K. Qasimov əvvəllər yardım alıb. Amma sonradan Füzuli rayonundan qeydiyyatdan çıxdığı üçün ona verilən yardım dayandırılıb.

İcra nümayəndəliyindən onu da bildirdilər ki, qeydiyyatı olduğu rayondan çıxıb və yenidən həmin yerə qeydiyyata düşən istənilən şəxsə yenidən yardım verilmir. Belə olan halda, K. Qasimov indidən öz başına çarə tapmaq qalır.
Mənbə
ANS TV

Xəbərdən istifadə edərkən istinad etmək vacibdir.