"Mənə 4-cü məhəllə sakinləri şikayət edib. Dedilər ki, "Mahal” MTK ilə bizim danışıqlarımızı aparın. Onlara ilkin hüquqi yardımı elədim. Bildirdim ki, siz burda mülkiyyətçisiniz. Burda dövlət layihəsi icra olunmur. Sadəcə hansısa sahibkar bina tikərək, pul qazanmaq istəyir. MTK istənilən halda sizinlə razılaşmaq məcburiyyətindədir. Lakin razılaşmırlar”.
Xeberle.com xəbər verir ki, bunu ARB televiziyasında "Günə son” verlişində danışan hüquqşünas Ramil Süleymanov deyib. O qeyd edib ki, vətəndaşların hüquqlarını kobud şəkildə pozan "Mahal” MTK söküntü işini apararkən ərazini narkoman yuvasına çevirib. Bu azmış kimi, binada yaşayan sakinləri də qorxutmağa çalışırlar:
"Təşəbbüs gözəldir. Lakin şəhər rəhbərliyi podratçı şirkəti buraxdığı zaman araşdırma aparmalıdır. Çünki "Mahal” MTK ilə bağlı sosial mediada araşdırma aparsaq görərik ki, çox sayda şikayət var. Şirkətin təmsilçisi deyir ki, vətəndaşlar bizimlə razılaşmır. Təbii ki, bu vətəndaşların hüququdur. Daha sonra deyir ki, qanunsuz artırmalar var. Siz kimsiniz ki, vətəndaşın artırmasına "qanunsuz” adı qoyursunuz? Bununla bağlı icra hakimiyyəti sözünü deməlidir. Bundan əlavə, artırmalarla bağlı hamının əlində sənədi var. Onu da qeyd edək ki, "Mahal” MTK söküntü işini apararkən, oranı narkoman yuvasına çevirib. Eyni zamanda, etiraz edən vətəndaşları da qorxudurlar”.
Verlişdə o da qeyd edilib ki, "Mahal” MTK "Qaraçanta” Dental klinikanın girişinin qabağını qeyri-qanuni olaraq hörüb.
Elşən Yəhyayev
Xəbərdən istifadə edərkən istinad etmək vacibdir.
