Budəfəki müsahibimiz gənc rəssam Məryəm Qurbanovadur. Sumqayıt şəhərində yaşayan Məryəmin ən böyük arzusu rəsm əsərləri ilə bağlı sərgisinin açılmasıdır.
Xeberle.com-un əməkdaşı 12 yaşlı gənc rəssam Məryəm Qurbanova ilə həmsöhbət olub.
- Məryəm, səni yaxından tanıyaq...
Mən, Qurbanova Məryəm Ramin qızı 2012-ci ildə Sumqayıt şəhərində anadan olmuşam. Həvəskar rəssamam. Hazırda Sumqayıt şəhəri İ.Qayıbov adına nömrəli tam orta məktəbin 6 b sinfində təhsil alıram. Rəssamlığa 4 yaşımda baslamışam. İlk olaraq, cızma-qara rəsmlər çəkirdim. Daha sonra, valideynlərim məndə rəsm bacarığını kəşf etdilər. Özəl kurslara getməyə başladım. Bununla bacarıqların daha da inkişaf etdi. Müəyyən müddət sonra bu məndə vərdiş halına çevrildi. Hər gün bir və ya iki rəsm çəkirəm. Rəsmlərim müxtəlif mövzulardadır. Son vaxtlar model eskizləri çəkirəm. Bu da məndə gələcəkdə modelyer olmaq fikrini yaradıb. Onu da qeyd edim ki, məktəbimizdə keçirilən sərgi tədbirlərində iştirak edirəm.
- Əsasən, hansı tərzdə rəsmlər çəkirsən?
Müxtəlif təsvirlər, əsasən dəniz, çəmən və fəsillərə aid mənzərələr çəkməyə üstünlük verirəm. Həmçinin, müxtəlif gül rəsmləri və s. qədim dövrə aid rəsmlər çəkirəm.
- Rəssam olmaq fikrinə necə gəldin, bu istedadı özündə necə kəşf etdin?
Kiçik yaşlarımda rəsmləri oxşatmağa çalışırdım. Sonra gördüm ki, bu bacarıq məndə alınır. Rəsmlərim oxşadıqca həvəsim daha da artdı.
- Hansı rəssamları daha çox sevirsən? Kimi ruhən özünə daha yaxın hiss edirsən?
Ümumiyyətlə, rəsm dedikdə ağlıma rəssamlardan Leonardo da Vinçi gəlir, azərbaycanlı rəssamlardan isə Toğrul Nərimanbəyov, Vəcihə Səmədovanın və Tahir Salahovun əsərləri mənə görə çox gözəl və ürəkaçandır.
- Elə rəsm olub ki, çəkəndə alınmasın?
Bəli, bir neçə dəfə olub. Amma, mən buna görə heç kefimi pozmuram. Çünki, bilirəm ki, şəkil bəzən pis də alına bilər.
- Səni çəkməyə ruhlandıran şeylər nələrdir? Ya da, bir şey çəkmək üçün içində həmin an nə hiss edirsən ki, "bunu çəkməliyəm", - deyirsən?
Əsasən, ətrafımda gördüklərim mənə ilham verir və dərhal onları kağız üzərində təsvir etməyə çalışıram.
- Sərgi açmaq haqqında düşünürsən?
Bəli, sərgi açmaq ən böyük arzumdur deyərdim. Çünki hamının əl işlərimi görməsini istəyirəm. Bu, məni çox sevindirərdi.
Dərslərini necə oxuyursan? Ən sevdiyin fənn hansıdır?
Dərslərimi yaxşı oxuyuram, sözsüz, ən sevdiyim fənn rəsmdir.
- Asudə vaxtını necə dəyərləndirirsən?
Asudə vaxtlarımda rəsm çəkirəm, müxtəlif oyunlar oynayıram və gəzintiyə çıxmağı xoşlayıram.
- Gələcək haqqında hansı planların var?
Gələcəkdə Rəssamlıq Akademiyasında daxil olub, moda dizayneri üzrə ixtisaslaşmaq istəyirəm.
- Sumqayıtda hansı məkanları sevirsən?
Dənizkənarı yerləri sevirəm.
- Şəhərimizdə hansı dəyişikliklərin olmasını istəyərsən?
Sumqayıt şəhərində də metro olmasını çox istərdim. Çünki, bunun bütün sakinlər üçün rahat olacağını düşünürəm.
- Məryəm, sənə təhsil həyatında və işlərində uğurlar arzu edirik.
Təşəkkür edirəm.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
