A.Hacıyeva, göstərilən diqqətə və yaradılan şəraitə görə, SDU-nun rektoru Rüfət Əzizova öz dərin təşəkkürünü bildirdi. O, Ümummilli Lider Heydər Əliyevin anadan olmasının 101-ci ildönümü çərçivəsində, həyata keçirilən tədbirin mahiyyətindən danışaraq, Ulu Öndərin bütün sahələr kimi, ədəbiyyatımıza və mədəniyyətimizə göstərdiyi diqqət və qayğını xüsusi vurğuladı. Qeyd etdi ki, Heydər Əliyev fəaliyyəti dövründə ədəbiyyatımızda özünəməxsus dəsti-xətti olan, repressiya qurbanlarına çevrilmiş mütəfəkkirləri hər zaman diqqətdə saxlamışdı. SSRİ Dövlət Təhlükəsizliyi Nazir­liyinin Leninqrad Xüsusi Məktəbini bitirib Bakıya qayıdan Heydər Əliyev, 1953-cü ildə şöbə rəisi təyin edildikdən sonra, məxfi sənədlərlə tanış olur və xalqımıza qarşı aparılmış repressiya tədbirlərini araşdırmağa başlayır. Heydər Əliyev repressiya illərini xatırlayaraq 1997-ci ildə demişdi: "Mən 1937–1938-ci illərin materiallarına ba­xanda gördüm: kim idi o vaxt NKVD-nin başında duranlar? Qriqoryan, Markar­yan, Topuridze (yarı erməni, yarı gürcü) və başqaları. 1953-cü ilə kimi bu orqan­larda qalmış, Azərbaycana xəyanət etmiş adamlardan idi, onların əksəriyyəti azərbaycanlı deyildi”.

A.Hacıyeva bildirdi ki, belə repressiya qurbanlarından biri də Azərbaycanın görkəmli filosof-şairi, dramaturq Hüseyn Cavid olub. 1982-ci ildə Hüseyn Cavidin nəşinin Sibirdən gətirilərək doğma vətənində dəfn edilməsi, mənəvi bəraət alması, ev-muzeyinin təşkili, yubileylərinin dövlət səviyyəsində qeyd olunması və s. Ulu Öndərin təkcə şairə deyil, bütün Azərbaycan ədəbiyyatına və bədii-ictimai fikrinə ehtiramının təcəssümü idi.

Heydər Əliyevin göstərişindən sonra, 1982-ci il oktyabrın 12-də Naxçıvan Vilayət Partiya Komitəsi Hüseyn Cavidin məzarının tapılması, cənazəsinin qalıqlarının Azərbaycana gətirilməsi ilə bağlı tarixi bir qərar qəbul etdi və belə bir şərəfli işin icrası Naxçıvan Vilayət Partiya Komitəsinin katibi, yaradılan komissiyanın sədri Həmid Cəfərova həvalə olundu.

Hadisələri özündə əks etdirən videoçarxın nümayişindən sönra söz polkovnik Həmid Cəfərova verildi.

H.Cəfərov H.Əliyev şəxsiyyətindən söz açaraq, ötən günləri xatırladı və qeyd etdi ki, 41 il öncə, 1982-ci ilin oktyabrın 26-da Hüseyn Cavid doğma Azərbaycanına qovuşdu. Görkəmli siyasi xadim Heydər Əliyevin təşəbbüsü, xeyir-duası, qayğısı ilə uzaq Sibirin əlçatmaz yerlərindən Azərbaycan poeziyasında fəlsəfi lirikanın təkrarsız nümunələrini yaradan Cavidin cənazəsinin qalıqlarının Azərbaycana gətirilməsi, ədəbi mühitimizdə əlamətdar bir tarix, uğurlu və cəsarətli bir addımın məntiqi nəticəsi kimi, böyük ictimai-siyasi hadisə oldu.

Daha sonra, mövzu ilə bağlı,İctimai xadim, Beynəlxalq Sülh Səfiri, "Dövlət və Qanun” qəzetinin B/redaktoru, AYB-nin üzvü Yasəmən Möhübbətqızı; "Ağrıdağ” Cəmiyyətinin sədri, N.Nərimanov rayon Ağsaqqallar Şurasının sədr müavini Kamil Babayev; AYB-də "Multikultural məsələlər” üzrə məsul şəxs, "Mədəni İnkişafın Təbliği” İB-nin sədri, "mitmedia.az” saytının təsisçisi və rəhbəri, şair Xatirə Fərəcli; Hərbi Dəniz Donanması Hospitalının əməkdaşı, N.Nərimanov rayon Ağsaqqallar Şurasının üzvü Zülfiyyə İsmayılova; "vetenim-azerbaycandir.az” və "öndertv.orq” saytlarının rəhbəri, peşəkar jurnalist Kamran Orucov çıxış edərək Ümummilli Lider Heydər Əliyevin bu istiqamətdəki fəaliyyətindən, atdığı uğurlu addımlardan danışdılar. Dahi şəxsiyyətin, fenomen yaddaşa malik olan uzaqgörən siyasətçinin məşhur fikri də xatırlandı: "Bizim ədəbiyyatımızın xalqımıza etdiyi ən böyük xidmət ondan ibarətdir ki, şairlərimiz, yazıçılarımız öz əsərləri ilə Azərbaycanda, xalqımızda, millətimizdə daim milli hissiyyatları oyatmağa çalışmışlar. Milli özünüdərk, milli oyanış, dirçəliş prosesi xalqımıza birinci növbədə ədəbiyyatdan keçir”.

SDU-nun Elmi kitabxanasının müdiri Nailə Əmrahova çıxış edərək, belə tədbirlərin, görüşlərin gənclərin maariflənməsi istiqamətindəki əhəmiyyətdən danışdı və gələn qonaqlara öz təşəkkürünü bildirdi.

"VİP” Mərkəzinin rəhbəri Aygün Hacıyeva tədbirin yüksək səviyyədə keçməsinə şərait yaradan və diqqət göstərən şəxslərə; universitetin rektoru R.Əzizova, prorektor E.Xəlilova, prorektor köməkçisi Şükür Əliyevə, SDU Tələbə Həmkarlar İttifaqı Komitəsinin sədri Elmin Novruzlu, həmçinin zəhməti keçən hər kəsə dərin minnətdarlığını bildirdi, müəllim və tələbə kollektivinə, başda rəhbərlik olmaqla, gələcək addımlarda uğurlar dilədi.

Tədbirin sonunda komissiyanın üzvü, Daxili İşlər nazirinin sabiq müavini, polis polkovniki Telman Əliyevin H.Əliyevə və H.Cavidə həsr etdiyi mahnılar səsləndi.

Həmin günün xoş xatirəsi, şəkillərin çəkilməsi ilə, tarixin yaddaşına həkk olundu...