Tədbirdə açılış nitqi ilə çıxış edən Sumqayıt Dostlar Klubunun rəhbəri Hümbət Quliyev qeyd etmişdir ki, bu tarix dünyada qeyri-rəsmi bayram kimi qeyd olunur. Bütün xalqlar hər zaman ən böyük mənəvi dəyərlərindən biri sayılan dostluğa önəm verir. Təsadüfi deyil ki, müxtəlif ölkələrdə dostluğa həsr olunmuş bayramlar mövcuddur. Bunlardan biri də hər il iyunun 9-unda qeyd olunan beynəlxalq dostlar günüdür. Bu gün bizə həyat şəraitindən, müxtəlif ziddiyyətlərdən asılı olmayaraq dostluğun nə qədər vacib olduğunu bir daha xatırladır. 

Hümbət Quliyev əlavə etmişdir ki, uzun müddətdir fəaliyyət göstərən Dostlar Klubu bu gün münasibətilə şəhərimizdə kitabxanaçılarımızla birgə artıq ənənəyə çevrilmiş tədbir düzənləyir.  Kitabxanaçılar Sumqayıtın ən fəal oxucularını seçirlər və biz də bir araya yığışıb həm oxucuları, həm də kitabxanaçıları təbrik edirik. İstəyirik ki, yeniyetmə və gənclərimiz mütaliə etsinlər, kitabı sevsinlər. Çünki kitabı sevənlər daha uğurlu olurlar. Və bizim nəsil kitaba görə uğur qazanmışdır. Məqsədimiz, məramımız budur ki, mütaliəyə maraq daha da artsın. Əlbəttə, müasir texnologiyalardan istifadə də zəruridir, inkişafdan bəhrələnmək gərəkdir. Buna baxmayaraq, kitab oxunmasını təbliğ etməkdən çox məmnunuq.

Çıxış edənlər də Dostlar gününün və tədbirin əhəmiyyətindən danışmış, Dostlar Klubunun ənənəsini təqdirəlayiq hesab etmişlər.

Tədbir musiqi nömrələri və şairlərimizin səsləndirdikləri şeir nümunələri ilə davam etdirilmişdir.

Həmçinin fəal oxucu layihəsi üzrə keçirilən müsabiqənin qalibləri ziyalılarımızın təqdimatı ilə mükafatlandırılmışlar.