Sumqayıt şəhərindən hər səhər saat 07.45-də Bakı istiqamətə hərəkət edən ekspress qatarlarda böyük sıxlıq yaranıb. Məlum olub ki, qatarın vaqonlarının sayı yarıbayarı azaldılıb. 
Görəsən, bayramqabağı son iş gündə insanların ən çox evdən çıxdığı vaxt bu "qabaqcıl islahat" niyə aparılıb? Nəzərə alsaq ki, bu gün həm də ölkə üzrə son zəng tədbirləri keçirilir, Abşeron yarımadası üzrə insan kütləsi sıxlığını təsəvvür etmək çətin deyil. Belə məqamlarda xüsusən ictimai nəqliyyatın rolu parlaq görünür.


Növbəti sual yaranır. Əgər vaqon sayı azaldılıbsa bu barədə niyə öncədən ictimaiyyətə məlumat verilmir? Hər halda səhər ayaqüstü gedən sərnişinlər bununla bağlı gileylənirdilər.
Məsələ ilə bağlı "Azərbaycan Dəmir Yolları” QSC-nin mətbuat xidməti ilə əlaqə saxladıq. ADY-nin Mətbuat Katibliyi şöbəsinin müdiri Sənubər Nəzərova Xeberle.com-un suallarını cavablandırıb. O qeyd edib ki, bayramqabağı sərnişin tələbatı çox olan istiqamətlər üzrə və qatarların dolumluluq səviyyəsinə görə vaqon sayı tənzimlənir:
"Dəmir yolu qaydalarına əsasən istiqamətlər üzrə reys ləvğ edildikdə ictimaiyyət öncədən məlumatlandırılır. Bayramqabağı şəhərdən bölgələrə sərnişin axını çox olduğundan sərnişin tələbatının qarşılanması və istiqamətlər üzrə ən çox sıxlıq müşahidə olunan marşrutlar üzrə qatar və vaqon sayı müəyyən edilir”.


Bax belə, məlum olur ki, ADY bayramqabağı daha çox şəhərdən çıxanları nəzərə alır, nəinki şəhərdə qalanları.