Artıq bir müddətdir ki, Sumqayıt və Bakı arasında ekspress avtobuslar fəaliyyətə başlayıb. Bu avtobusların Sumqayıt avtovağzalı, "Bağçalı evlər” yaşayış kompleksi, Sumqayıt dairəsi, Ceyranbatan qəsəbəsi, metronun "Avtovağzal” stansiyası, Bakı Beynəlxalq Avtovağzal Kompleksi marşrutu üzrə hərəkət etməsi müəyyənləşib.
Sərnişinlərdən biri redaksiyamıza müraciət edərək bildirir ki, avtobusun dolu gəlməsi səbəbindən 20 dəqiqə "Bağçalı evlər” yaşayış kompleksinin dayanacağında gözləməli olub. Şikayətçi bildirir ki, səhər saatlarında ekspress avtobusların Sumqayıt avtovağzalından dolu gəlməsi digər dayanacaqlarda olan sərnişinlərin avtobusa minə bilməsinin qarşısını alır.
Məsələ ilə bağlı Azərbaycan Yerüstü Nəqliyyat Agentliyi (AYNA) ilə əlaqə saxladıq. Qurumdan bildirilib ki, xətdə 14 avtobus 11 dəqiqə intervalla sərnişinlərə xidmət göstərir: "Sumqayıtdan Bakı şəhəri istiqamətinə ictimai nəqliyyatın təşkili ilə bağlı sərnişin tələbatı nəzərə alınaraq, bu ilin yanvarından Azərbaycan Yerüstü Nəqliyyat Agentliyi tərəfindən Sumqayıt şəhər Avtovağzalını Bakı Beynəlxalq Avtovağzal Kompleksi ilə əlaqələndirən ekspres marşrut xətti təşkil edilib. Xətdə 14 avtobus 11 dəqiqə intervalla sərnişinlərə xidmət göstərir.
Ekspres avtobuslarda ayaqüstə sərnişin daşınma üçün konstruksiya nəzərdə tutulmadığından, bu, yolverilməzdir və təhlükəsizlik qaydalarının pozulması deməkdir. Eyni zamanda vurğulayaq ki, Bakı və Sumqayıt arsında sərnişindaşıma fəaliyyəti göstərən ekspres avtobuslarında təhlükəsizlik baxımından maksimal sürət saatda 70 km müəyyən edilib".
Elşən Yəhyayev
Xəbərdən istifadə edərkən istinad etmək vacibdir.
