Tələbə Qəbulu üzrə Dövlət Komissiyası mayın 17-də ali təhsil müəssisələrinə əvvəlki illərin məzunları üçün II və III ixtisas qrupları üzrə qəbul imtahanı keçirib. Sənəd verən 16071 abituriyentdən 1010 nəfəri imtahana gəlməyib. İştirak edən 15061 abituriyentdən 35 nəfəri qaydaları pozduğu üçün imtahandan xaric olunub və nəticələri ləğv edilib.
Qalan 15026 abituriyentin imtahan nəticələri bəlli olub.
İmtahanda III ixtisas qrup üzrə 600-dən yuxarı bal toplayıb tələbə adını qazanan iki nəfər var. Bunlar Cavad Qənizadə və Mətanət Ruhullayevadır. Hər iki tələbə öz təəssüratlarını bölüşüb.
Cavad Qənizadə:
"2014-cü ildə Şəki şəhər Qaratorpaq tam orta məktəbini bitirmişəm. Ötən ilki qəbul imtahanlarında 577 bal topladım, amma bu, mənim arzuladığım nəticə olmadığı üçün universitetə getməkdən imtina etdim. Məqsədim yüksək bal toplayıb BDU-nin Hüquq fakültəsində ödənişsiz əsaslarla təhsil almaq idi. Orta məktəbi bitirdikdən sonra ailəmlə birlikdə Bakı şəhərində yaşadım. Bu müddətdə əlavə hazırlıqlarda və məşğələlərdə oldum. Deyə bilərəm ki, bu il arzuma nail oldum. Bəli, imtahanda 653 bal topladım və yüksək nəticə əldə etdim. Kodlaşdırmanı BDU-nin Hüquq fakültəsinə uyğun edəcəyəm. Yüksək nəticə əldə etdiyimi mayın 19-da öyrəndim. Arzuma çatdığım üçün çox sevinirəm.
Bu il tələbə adını qazanmaq üçün imtahanda iştirak edən bütün abituriyentlərə öz arzularına çatmağı diləyirəm”.
Mətanət Ruhullayeva:
"Xaçmaz şəhər 9 saylı tam orta məktəbin məzunuyam. Artıq üçüncü ildir imtahan verirəm. Əvvəlki illərdə 544 bal və 492 bal toplasam da, universitetə getməkdən imtina etdim. Məqsədim BDU-nin Tarix fakültəsinə daxil olmaq idi. Əldə etdiyim nəticəyə görə məqsədimə nail ola bilmirdim. İki il ərzində repetitor yanında əlavə dərslərdə oldum. Amma 2015-ci il üçün artıq kursa getməyə qərar verdim və yüksək nəticəni əldə etdim.
Bu il imtahandan 680 bal topladım. Əslində, bu nəticəni yox, 700 bal toplamağı gözləyirdik. Amma qismət belə oldu. Sevincimin həddi-hüdudu yoxdur. Kodlaşdırmanı BDU-nin Tarix fakültəsi üzrə aparmağı fikirləşirəm”. (modern.az)
Xəbərdən istifadə edərkən istinad etmək vacibdir.
