Pünhan Mürsəliyev: «Dövlət əhəmiyyətli yol çəkilişi zamanı ağacların kəsilməsi aidiyyəti qurumlarla razılaşdırılıb»

Bakı-Sumqayıt avtomobil yolunun genişləndirilməsi başa çatmaq üzrədir. Artıq tikinti prosesi Bakı Beynəlxalq Avtovağzal Kompleksinin (BBAK) yaxınlığında, «Motodrom» adlanan yaşayış massivinin kənarında davam etdirilir. Bu məsələ son günlər həm də ona görə diqqət mərkəzindədir ki, genişləndirilməkdə olan yolda tikinti işləri artıq avtovağzaldan “20 Yanvar” istiqamətində yerləşən şam ağaclarından ibarət meşəlik zonasına dirənib. Nəzərə alsaq ki, genişləndirilməkdə olan yol həmin meşəlikdən keçəcək, onda yaxın günlərdə bu ağaların bir hissəsinin kəsiləcəyinin şahidi olacağıq.
Bəs, avtomobil yolunun genişləndirilməsi üçün kəsiləcək ağacların əvəzində yeni meşə massivi salınacaqmı? Yaxud bu ağacların başqa ərazilərə köçürülməsi mümkündürmü?
“Həftə içi”nin əməkdaşı olaraq, bu və ya digər suallara aydınlıq gətirmək üçün həmin əraziyə baş çəkdik. Genişləndirilmiş yolla faktiki istifadədə olan magistrla yolu bir-birindən armatur dirəklər və onlara bağlanmış qırmızı lentlər ayırırdı. Qazıntı aparılmış ərazidə istifadəsi dayandırılmış rabitə və kommunal xətlər aydın görünürdü. Torpaq yatağının salınması üçün şam ağaclarından ibarət meşə zonasının bir neçə metrliyinədək qazıntı işləri aparılıb. Hətta artıq burada 12 şam ağacının kökündən kəsildiyi də aydın görünür. Bir neçə ağac isə kökündən çıxarılaraq ətrafa atılıb. Hətta dərin bir çalada nəhəng şam ağacının doğranmış gövdəsinə də rast gəldik. 
Qazıntı zamanı çıxarılmış iri sal daşlar, doğranmış ağacların qol-budaqları, yolka yarpaqları meşənin giriş hissəsinə atılmışdı. Torpaq yatağının tikilməsi üçün torpaq örtüyünün qaşovlanması zamanı çıxarılan torpaqlar genişləndiriləcək yolun kənarlarında qalaq-qalaq yığılmışdı. Qazıntı zamanı bəzi ağacların köklərinin bayırda qalması da diqqətimizdən yayınmadı. 
Ətrafda yaşayan sakinlərlə söhbət zamanı öyrəndik ki, yolun genişləndirilməsi zamanı yolka meşəliyinin girişində məişət tullantılarının yığılıb daşındığı zibil dayanacağı ləğv ediləcək və onun mühafizə divarları söküləcək. Bundan əlavə, xeyli sayda yolka ağacı kökündən doğranacaq. Yolun genişləndirilməsi isə BBAK-ın qarşısındakı yaşıllıq parkına qədər davam etdiriləcək. Yolun genişləndirilməsi «Motodrom»da yaşayanların nəqliyyat vasitələrindən sərbəst istifadə etmələrinə şərait yaradacaq. 
«Azəryolservis» ASC-nin mətbuat xidmətinin rəhbəri Pünhan Mürsəliyev «Həftə içi»nə açıqlamasında bildirir ki, yolun genişləndirilməsi Bakı-Sumqayıt və Sumqayıt-Bakı istiqamətində avtomobil magistralında yaranan tıxacların aradan qaldırılması istiqamətində görülən tədbirlərdən biridir. Bu məqsədlə Bakı-Sumqayıt yolunun 9-cilometrliyində yeni yolötürücüsü tikilir və yeni iki zolaqlı yol çəkilir. Həmçinin avtomobillərin istənilən istiqamətə hərəkət etməsi üçün dairə tikilməsi də nəzərdə tutulur: «Yeni yol ərazidə yerləşən hərbi hissədən Yol Polisi postuna çıxışı təmin edəcək. Uzunluğu 45 metr olan bu yol bir aşırımlıdır. Sumqayıtdan Bakı istiqamətində Sulutəpə-Xocəsən-Biləcəri yolunun 4 zolaqdan 8 zolağa qədər genişləndirilməsi işləri də həyata keçirilir. Bu yolun uzunluğu 1,5 kilometr təşkil edir. Genişləndirmə nəticəsində yolun hər istiqamətində 4 zolaq olacaq. Eyni zamanda burada uzunluğu 110 metr olan yeni 3 zolaqlı yolötürücüsü də inşa olunur. Bu işlər yekunlaşdıqdan sonra, Sumqayıtdan hərəkət edən avtomobillər Xocəsən və Biləcəri istiqamətində hərəkəti davam etdirə biləcəklər. Onlar burada «Şamaxinka» adlanan ərazidən şəhərə daxil ola, Bakı-Şamaxı yolu, Bakı Beynəlxalq Avtovağzalı və Atıcılıq kompleksi istiqamətində hərəkət edə biləcəklər. Eyni zamanda avtomobillərin Bakı-Sumqayıt-Xocəsəndən avtovağzalın yaxınlığındakı dəmir yolu üzərindən mövcud yol ötürücüsünün yanındakı 4 aşırımlı yeni yol ötürücüsündən enərək, birbaşa Biləcəri istiqamətində də hərəkət etməsi mümkün olacaq. Yaxın gələcəkdə 1-ci dairəvi avtomobil yoluna da çıxmaq olacaq».

«Ağacların doğranması qanunsuzluq deyil»

Yolun genişləndirilməsi ilə əlaqədar meşəliyin bir hissəsinin ləğv olunacağı barədə deyilənlərə gəlincə, «Azəryolservis» rəsmisi bu məsələnin də aidiyyəti qurumlarla razılaşdırıldığını deyir. Onun sözlərinə görə, bu magistral dövlət əhəmiyyətli yol olduğundan onun yenidən qurulması layihəsi də dövlət tərəfindən dəstəklənib: «Bu baxımdan ağacların doğranması məsələsi qanunsuzluq deyil. Digər tərəfdən, «Azərbaycan Respublikası meşələrində köküstü oduncaq buraxılışı qaydalarının təsdiq edilməsi haqqında» Nazirlər Kabinetinin 15 mart 1999-cu il tarixli 38 nömrəli qərarı var. Həmin qaydalar Azərbaycan Respublikası meşələrində köküstü oduncaq buraxılışını tənzimləyir və meşədə oduncaq tədarükü və daşınması zamanı tətbiq olunur. Köküstü oduncaq buraxılışı meşədən istifadə rejiminə uyğun olaraq aparılır. Bu zaman başdan-başa sanitariya qırmaları, yəni su qovşaqlarının, boru kəmərlərinin, yolların, rabitə və elektrik xətlərinin tikintisi və digər işlərlə əlaqədar, meşə sahələrinin müəyyən olunmuş qaydada qeyri-meşə sahələrinə keçirildiyi zaman, həmçinin yanğından mühafizə keçidlərinin açılması və digər belə məqsədlər üçün qırmaların aparılmasına icazə verilir. Həmin qırmalar təsdiq olunmuş layihələr və aparılan işlərin texniki şərtlərinə uyğun olaraq yalnız meşəqırma bileti və order əsasında aparılır. Ona görə də dövlət əhəmiyyətli yol çəkilərkən ağacların doğranması, yaxud başqa ərazilərə köçürülməsi mümkündür».

Bakıda yeni yolka meşəlikləri salınacaq

Doğranacaq və ya köçürüləcək ağacların əvəzinə «Azəryolservis» tərəindən hər hansı bir ərazidə yeni meşə massivinin salınıb-salınmayacağı ilə də maraqlandıq. Pünhan Mürsəliyev deyir ki, yolun genişləndirilməsi prosesində hər şey prosedur qaydalar əsasında aparılır və Səhmdar Cəmiyyət yalnız öz üzərinə düşən işləri görür: «Yəni torpaq yatağının qazılması və bərkidilməsi, asfalt örtüyünün salınması və digər işlər bizim səhaliyyətimizdədir. Amma yeni meşələrin salınması ilə biz deyil, Ekologiya və Təbii Sərvətlər Nazirliyi məşğul olur. Yolun genişləndirilməsi ilə bağlı layihə dövlət tərəfindən həyata keçirildiyindən yolka meşəliyinin salınması məsələsi nazirliyin müvafiq qurumlarının fəaliyyət sahəsinə aiddir».
Nazirliyin mətbuat xidmətinin rəhbəri İradə İbrahimova da sözügedən yolun dövlət əhəmiyyətli olduğunu, şam ağaclarının doğranmasının və ya köçürülməsinin qanunsuz olmadığını vurğulayır. Onun sözlərinə görə, ləğv ediləcək meşəliyinin əvəzinə paytaxtın bəzi ərazilərində yeni ağaclar əkiləcək: «Ləğv ediləcək meşəlikdə bütöv çıxarılacaq ağaclar köçürülərək yeni meşəliklərdə əkiləcək. Əgər hər hansı bir ağac doğranacaqsa, onun əvəzinə yeni şam ağacı əkiləcək. Ümumiyyətlə, kəsiləcək ağacların 15 misil qədər yeni ağacların əkilməsi planlaşdırılıb».

Təbriz Vəfalı
fotoar müəllifindir

/hafta.az/