Əcnəbi universitetlərə hansısa yollarla düzəldilən tələbələrin aldığı diplomlar tanınmır
Bu gün ölkəmizdə ali məktəblərə daxil ola bilməyən abituriyentlər xarici ölkələrdə təhsil almağa can atırlar. Belə ki, bir sıra şirkətlər abituriyentlərin xarici ölkələrdə təhsil almalarına şərait yaradır. Abituriyentlər imtahansız ödəniş etməklə istədiyi universitetdə təhsil almaq imkanına malik olur. Bu isə əlbəttə ki, sonradan ortaya bir sıra problemlər çıxardır. Diplomun ölkəmizdə tanınması məsələsini aktuallaşdırır.
Əslində hər bir abituriyentin imtahan vasitəsilə ali məktəbə qəbulu daha təqdirəlayiq hesab olunur. Çünki savadsız şəkildə hansısa ali məktəbdə təhsil almaq yarımçıq təhsil kimi bir şeydir. Məsələn heç 100 bal toplaya bilməyən bir abituriyent gedib xarici ölkədə tibbi təhsil alırsa və həkim adını qazanırsa, bu həkimə sağlamlıq etibar etmək nə dərəcədə doğrudur? Ona görə də pulnan hansısa ali təhsil ocağında təhsil almaq keyfiyyətli təhsil vəd etmir. "İmtahansız tələbə adını qazan” kimi şüarlar gəncləri özünə cəlb edir. Təki instituta girib diplom alsın. Lakin hər şey diplom almaqla bitmir. Nəzərə alaq ki, artıq kimisə işə götürəndə onun diplomuyla o qədər maraqlanmırlar. Yəni peşəkarlıq ön plana çəkilir. İnsanın savadı, onun iş qabiliyyəti işəgötürən üçün əsas amillərdən biridir. Ola bilər ki, diplomun olsun, amma qeyri-peşəkar olasan, tapşırılan işin öhdəsindən gələ bilməyəsən. Belə olan halda isə nə ölkə daxilindəki, nə də xaricdəki təhsil müəssisələrinin diplomu köməyə gəlməyəcək. Bu gün xarici dilləri mükəmməl bilən, informasiya-kommunikasiya texnologiyaları ixtisaslarına yiyələnmiş və beynəlxalq diplomatik təcrübəni yaxşı mənimsəmiş kadrlara daha çox ehtiyac var.
Bu gün bəzi işbazlar vətəndaşları aldatmaqla da məşğuldurlar. Bəzən vətəndaşlar xarici ölkəyə oxumağa gedir. Sonda diplomla deyil, sertifikatla geri qayıdırlar. Məlum olur ki, onların göndərdikləri uşaqlar universitetlərin özündə yox, onların tərkibində fəaliyyət göstərən müxtəlif kurslarda dinləyici kimi təhsil alıblar. Maksimum 3 il çəkən bu kursları bitirəndən sonra isə onlara diplom yox, sertifikat verilir. Beləcə, minlərlə manat arada it-bata düşür. Daha doğrusu, kimlərinsə cibinə gedir. Əgər belə bir şey həqiqətən də olsaydı, onda azərbaycanlı gənclər əziyyət çəkib repetitor yanına getməzdi. Hazırlıqlara verdikləri pulu yığıb imtahansız xarici təhsil ocaqlarına gedərdilər. Demək ki, sözügedən məsələdə maddi maraqlar dillənir.
Bundan başqa diplomların tanınması da sual altında olur. Apardığımız araşdırmadan bəlli oldu ki, dövlət proqramından kənar xaricdə oxuyub ölkəyə qayıdan şəxslərin diplomları tanınmır. Təhsil Nazirliyi belə diplomları tanımır.
Qeyd edək ki, Konvensiyaya əsasən, diplomun tanınması üçün iki mühüm şərt var. Birincisi, xarici vətəndaşa ixtisas verən təhsil müəssisəsinin öz ölkəsində akkreditasiya olunması, yəni qanuni ali məktəb olmasıdır. İkinci şərt isə tələbənin həmin məktəbdə həqiqi şəkildə oxuyaraq diplom almasıdır. Əgər bu şərtlər ödənilibsə, nazirliyin diplomu tanımamağa əsası yoxdur.
Bu iki şərt ödənmirsə, xarici ölkələrin diplomları Azərbaycanda tanınmır. İmtahansız aparılan qəbullar nəticəsində əcnəbi universitetlərə hansısa yollarla düzəldilən tələbələrin aldığı diplomlar da bu qisimdəndir.
Yəni qanun çərçivəsindən kənar tələbə olanların diplomları birmənalı şəkildə tanınmayacaq. Ona görə də valideynlər diqqətli olmalı, belə kompaniyalara aldanmamalıdır. (ideologiya.az)
Xəbərdən istifadə edərkən istinad etmək vacibdir.
