Xəbər verdiyimiz kimi, Sumqayıt şəhərində yerləşən Şəhid Elçin Cəbrayılov küçəsinin sakinləri yol infrastrukturunun bərbad vəziyyətindən narazıdır. Xeberle.com-un əməkdaşı ərazidə olub, sakinlərlə söhbət aparıb.
Sakinlərin bildirdiyinə görə, küçədə asfalt örtüyü yoxdur. Bu səbəbdən həm piyadalar, həm də avtomobillər üçün hərəkət ciddi şəkildə çətinləşir. Xüsusilə yağışlı havalarda yol tamamilə palçıqla örtülür, nəticədə nəqliyyat vasitələrinin və insanların hərəkəti mümkünsüz hala gəlir.
Ərazi sakinlərinin şikayətinə əsasən, küçənin avtomobil yolunda yerləşdirilmiş beton maneələr də nəqliyyat vasitələrinin hərəkətinə ciddi problem yaradır. Bu isə təkcə gündəlik həyat üçün deyil, həm də təcili tibbi yardım və digər operativ xidmətlərin vaxtında əraziyə çatmasında gecikmələrə səbəb olur.
Məsələ ilə bağlı Sumqayıt Bələdiyyəsi Xeberle.com-a açıqlama verərək bildirib ki, adıçəkilən ərazidə asfaltlama işləri hazırda aparılmasa da, mövcud yolsuzluq problemi barədə məlumatlıdırlar və Şəhid Elçin Cəbrayılov küçəsinin gələcək planlara daxil edilərək asfaltlanması nəzərdə tutulub:
"Hava şəraiti ilə hazrda Sumqayıt Bələdiyyəsi tərəfindən asfaltlama işləri aparılmır. Qeyd etdiyiniz ərazidəki yolsuzluq problemi və digər məsələlərlə bağlı məlumatlıyıq. Və Bələdiyyənin perspektivdəki işlərinə daxil edilərək asfaltlanması nəzərdə tutulub”.
Xəbərdən istifadə edərkən istinad etmək vacibdir.
