İndi əksər xəbər portalları jurnalistika deyil, statistika ilə məşğuldurlar. Xəbərdə dəqiqlik, operativlik keçib LAP arxa plana, bu günün xəbər jurnalistikası İP-lərə, statistik göstəricilərə hesablanıb. Hətta elə təsəvvür yaranır ki, bu saytlarda xüsusi "beyin mərkəzləri” fəaliyyət göstərir. Oxucunu daha çox necə aldatmaq olar, necə bir başlıq yazaq ki, hər kəs bu "xəbər”i oxusun!?

oxucu=müştəri...?

Əslində dünya praktikasında maraqlı və hardasa oxşar bir təcrübə var. Xüsusi şəxslər ayrılır ki, onların işi çalışdığı qəzet və ya portalda dərc olunan məqalələrin yalnız başlığını müəyyənləşdirməkdən ibarətdir. Burda marketinqin prinsipləri başlıca rol oynayır – Əgər oxucuya müştəri gözü ilə yanaşılsa, burda əsas məqsəd potensial müştəriləri cəlb etmək: müəsissənin bazardakı payının artımı üçün yeni müştərilərin cəlb olunmasıdır. AMMA bu işi yaradıcı, mütaliəli və təcrübəli şəxslərə həvalə edirlər. Azərbaycanda fəaliyyət göstərən əksər xəbər portalları isə oxucuya bütün hallarda müştəri gözü ilə baxırlar və sanki bu başlıqların müəllifi də elə bazar alverçisidir. Bu faktdır. Heç kim inkar edə bilməz, heç kim.

Zərərli vərdiş...

Nəticədə ucuz, bayağı, çox vaxt heç bir fakta söykənməyən xəbərlər və xəbər başlıqları əksər portalları "bəzəyir”. Bununla həm də oxucunun beyni "zəhərlənir”. Bu tip xəbərlər oxucunu daha çox cəlb etməyə başlayır. Onun düşünmək qabiliyyəti zəifləyir və sanki bir zərəli vərdişin aludəçisi olur. Bir sözlə hər şey bir məqsədə hesablanıb - saytın ziyarətçilərinin sayı süni şəkildə artsın. Bu süni statistikadan qazanan "jurnalist”ciklər, itirənsə bütünlükdə xalqdır… TƏƏSSÜF Əlavə: Amma nə yaxşı ki, xəbər portallarının sırasında həqiqətən də əsl xəbərçilik, professional jurnalistika prinsipləri ilə fəaliyyət göstərənləri də var. Hesab edirəm ki bu, birinci növbədə həmin portallara rəhbərlik edən şəxslərdən asılı məsələdir.

Elnur Niftəliyev
Xeberle.com