Sumqayıtda 3 saylı marşrut avtobuslarında gediş haqqı artırılıb.   Əvvəllər  marşrut xəttindən istifadə edən sərnişinlər bunun müqabilində 20 qəpik ödəyirdilərsə, indi bu məbləğ 5 qəpik artırılaraq 25 qəpiyə çatdırılıb.  Sözügedən marşrut xəttində gediş haqqının artırılması  sərnişinləri narahat edib. Bununla bağlı narazı vətəndaşlar “Xeberle.com”-a müraciət ediblər.

Məsələ ilə bağlı Dövlət Avtomobil Nəqliyyatı Xidmətinin Sumqayıt Regional şöbəsinin rəisi  Anar Səfərli ilə əlaqə saxladıq.  Şöbə rəisi xeberle.com - a  açıqlamasında bildirdi ki,  gediş haqqının 25 qəpiyə qaldırılması yalnız 3 saylı marşrut avtobuslarına şamil olunub.  Qiymət artımını şöbə rəis belə əsaslandırdı: “Ötən il  Azərbaycan Respublikasının   Tarif Şurası  “Ümumi istifadədə olan avtomobil nəqliyyatı ilə (taksi istisna olmaqla) ölkədaxili sərnişindaşıma xidmətlərinin tariflərinin tənzimlənməsi barədə”   1 №-li  qərar qəbul edib.   Qərarda şəhər və rayon mərkəzlərində (Bakı şəhəri istisna olmaqla) fəaliyyət göstərən şəhərdaxili, şəhərətrafı və qəsəbələrarası marşrutlarda sərnişindaşıma xidmətlərinin tariflərinin yuxarı həddi müəyyən edilib. Qərarda göstərilib ki,  şəhərətrafı və qəsəbələrarası 15 km-dən 25 km-dək (25 km daxil olmaqla) olan  məsafələrdə gediş haqqı 25 qəpik müəyyən edilir.  Sumqayıt şəhərinin daxilindən hərəkət etməklə Hacı Zeynalabdin qəsəbəsi istiqamətinə işləyən 3 saylı marşrut xəttinin uzunluğu 17 kilometirdir. Məsafə 15 km-dən yuxarı olduğuna görə həmin marşrutlarda gediş haqqı 25 qəpiyə qaldırılıb.  Məndən öncə çalışan rəhbərlik isə qəbul edilən qərarın icrasını həyata keçirməyib”.

A.   Səfərli digər marşrutlarda isə gediş haqqının qaldırılmayacağını da sözlərinə əlavə edib.

Türkan, xeberle.com