ELVİN BABAYEV

Bu ölkədə baş verən əndrabadi olaylar barədə yazdıqca usanmırsan, əksinə daha da ilhama gəlib yazdıqca, yazırsan. Mövzu o qədər boldur ki, haradan başlayıb harada qurtaracağını belə, türk demişkən, şaşırırsan. Odur ki, yazımda qırılmalar, sapmalar olarsa, qınamayın məni. Əlqərəz başladıq.

E.ə. 443-cü ildə qədim Yunanıstanda Perikl adlı görkəmli siyasətçi, orator strateq seçilir və ömrünün sonuna kimi, yəni 15 il strateq kimi fəaliyyətini davam edir. Strateq, bir növ müasir dövrdə baş nazir kimi vəzifədir. Nədənsə həmin Perikl bizim çox hörmətli baş nazirimiz Artur müəllim Rəsizadəni xatırlatdı mənə. Allah torpağı sanı qədər ömür versin Artur müəllimə. Niyə xatırlatdı? Deyim, agah olun.

Hər ikisi ən azı 15 il vəzifədə qalıb və bu arada Artur müəllim Periklin rekordunu vurub da. Beləki, o, 15 il, bizim sevimli baş nazirimiz isə fasilə ilə 16 ildir ki, bu postda qalır və Ulu Tanrıdan diləyirik ki, daha 16 il baş nazirimiz olsun. Ən azından üzümüz-gözümüz öyrəşib. Və şəxsən mənim arzum odur ki, Allah baş nazirimizi ömürlük bizə strateq etsin. Amin!!! Xahiş edirəm, siz də “Amin!” deyin, əks-təqdirdə deməyənlərə dədə-baba qarğışımızı ünvanlayacam.

Mən öz baş nazirimizdən yerdən-göyə qədər razıyam. Soruşacaqsınız niyə? Çox sadə. Ən azından bizim baş nazirimizin adı digər baş nazirlər kimi rüşvət, korrupisya qalmaqalında hallanmır. Bu yaxınlarda Avstraliyanın baş naziri ona hədiyyə edilən bir şüşə çaxırın hardan gəldiyini deyə bimədiyi üçün istefaya getdi. Heç Artur müəllimin başına analoji hadisə gəlib? Şəxsən mən onun yemək yeməyinə, içməyinə belə şübhə edirəm. O, sanki əvvəllər müəllimlərimizi sandığımız kimi yemir-içmir.

Gəlin qardaş Türkiyənin baş naziri sayın Ərdoğan bəyə baxaq. Səsi batdı, amma mikrofondan əl çəkməyərək müxalifətin əleyhinə asıb-kəsdi. Hətta onu mikrofonsuz belə təsəvvür etmək belə çətindir. Bilmək olmur, nazirdir, yoxsa... Amma Artur müəllim Allahın altında bircə dəfə olsun belə müxalifətin əleyhinə bir kəlmə belə cümlə söyləməyib. Əsl liberal, mühafizəkar siyasətçidir. Nə iqtidar ondan narazı olur, nə də müxalifət. İnanmırsınızsa, ən qatı müxalifətçidən soruşun ki, iqtidarda sevdiyiniz məmur kimdir? Cavab verəcəklər ki, Artur Rəsizadə.

Baş nazirimizin vur-tut bir neçə nitqi olub ki, onlar da elə məsələlər barədədir ki, beynəlxalq, yaxud daxili gərginlik yaratmır. Artur müəllimin duzlu xiyar barədə milli konsepsiyası həm kənd təsərrüfatının, həm də qida sənayesinin inkişafına müsbət təsir göstərdi.

Kim nə deyirsə, desin mən Artur müəllimi dəstəkləyirəm. Çox sadə və ziyalı şəxsiyyətdir.

Bu arada daha bir məsələyə toxunmaq istəyirəm.yolların birdən-birə qəfildən çökməsi məsələsi məni çox narahat edir. Çox hörmətli və dəyərli nəqliyyat nazirimiz Ziya müəllimin avtomobil və sərnişinlərimizi işıqlı gələcəyə çıxaracaq yolları “beyqafıl” çökməyə başladı. İlk əvvəl Zimbabvenin büdcəsi qədər pul xərclənən Bakıdan Qubaya qədər uzanan magistral beton yol sıradan çıxdı. Daha sonra paytaxtda ardı-ardınca magistral şosselər çökdü. Hər yol çökdükcə Ziya müəllimin vəzifə kreslosundan bir kərpic düşür sanki. Bir tərəfdən də Nəqliyyat Nazirliyinin qoçularının özbaşınalıqları. Əşşi, Ziya müəllim hansı bir problemin öhdəsindən gəlsin. Oğluna ayı əti çatdırsın, yoxsa havayı yeyən məmurlarının, işçilərinin şıltaqlıqlarını ört-basdır eləsin. ANS də bir tərəfdən düşüb Ziya müəllimin üstünə. Marşrutlar belə gəldi, elə getdi. Elə bu ANS deyə-deyə o boyda Metro Tağının axırına çıxdı. Dilim-ağzım qurumasın birdən Ziya müəllim də Tağı müəllimin getdiyi axırıncı dayanacağa çatar.

Sonda ölkənin birinci idmançısı Azad müəllim Rəhimov barədə də bir neçə cümlə deyərək, üçbucağımı tamamlayım. Son zamanlar Azad müəllim barədə də mətbuatda birmənalı olmaya fikirlər səslənir. Hətta görkəmli idmançımız Zülfiyyə xanımın nazirin ünvanına səsləndirdiyi fikirlərdən istifadə edərək Azad müəllimi asıb-kəsənlər az deyil. Hörmətli söz deyənlər, tırkaya gedib tələsməyək və nazirimizi qılınclamayaq. Zaman gələr problemlər öz həllini tapar və əziyyətiniz özünüzə qalar. Yəni Azad müəllim vəziyyətdən çıxış yolu taparaq idmanımızdakı xırda məsələləri çözə bilər. Məsələn, olimpiya komlekslərindən bir neçəsinin rəhbərinin mitilini işdən atar və yaxud da bu komplekslərin tikintisində sement, metlax və s. oğurlayan bir-iki nəfəri basdırar qoduxluğa ki, bununla da sudan duru, aydan arı çıxar. Günah öləndədir deyib, babalı Sərvərin boynuna qoyub korrupsiya və rüşvətxorluğa qarşı mübarizə adı altıda bir əməliyyat keçirərlər ki, özün də bunu alqışlayarsan. Odur ki, otur oturduğun yerdə.

Oturmaq demişkən, park və bulvardakı skamyalara “şotçik” qoşmaq lap əla olar. Yoxsa ki, orda oturan sevgililər, yaxud təqaüdçülər əməlli-başlı inhisarlaşıb.