Bir həftə bundan əvvəl gənclər və idman naziri Azad Rəhimov keçirdiyi mətbuat konfransında “ANS“ televiziyasını məhkəməyə verəcəyini bildirdi.

Bu addımın Daşkəsən rayonundakı Gənclər Mərkəzinin tikintisində korrupsiya faktına yol verilməsi ilə bağlı yayılan iddialara görə atıldığı deyilir. 

“ANS“ Şirkətlər Qrupu prezidentinin media üzrə müşaviri Mais Məmmədov Hafta.az-a verdiyi açıqlamada bu və digər məsələlərə münasibət bildirib:

“O açıqlamanı biz etməmişik, Hesablama Palatası edib. Göstərilib ki, yeyinti çox var. Biz də sadəcə, bu məsələni qaldırmışıq. Biz nazirdən soruşuruq ki, nəyə görə bu yeyinti olub? Axı yeyilən pullar bizim pulumuzdur”.

Mais Məmmədov “Yeni Müsavat”da dərc olunmuş “Azad Rəhimovla “ANS“in saat çəkişməsi” məqaləsinə də fikir bildirib:

“Yeni Müsavat” yalan yazır! Bir neçə il bundan əvvəl “Yeni Müsavat” yazmışdı ki, “ANS“ vermişel, makaron satır. O qəzet belədir də, nə istəyir yazır... Bu, düzgün deyil axı. Neçə il öncə bir olimpiya stadionu bir milyona başa gəlirdi, indi 13-14 milyondur. Noldu, nə xəbər? Yaxşı, başa düşürük, qiymətlər, maaşlar qalxıb. Amma ikiqat, üçqat olsun da, 12-13 qat yox. Niyə “Yeni Müsavat” bunu qaldırmır?! Nə istəyirsiz yazmaq olar. Kağız, ruçka, kompüterdir də...”.

Məlumat üçün deyək ki, sözügedən məqalədə telekanalın nazirlə bağlı “qərəz”inin əslində saat biznesi olduğu göstərilir. Belə ki, qəzet Azad Rəhimovun “ANS“in prezidenti Vahid Mustafayevin biznesini çökdürdüyünü yazır.