Son günlər Sumqayıt şəhər sakinlərinin içməli su ilə təminatında ciddi problemlər yaşanır. İsti yay günlərində əhalinin fasiləsiz olaraq icməli su ilə təmin olunması, artıq həllolunmaz problemə çevrilib. Şəhərin bir çox məhəllə və mikrorayonlarında su fasilə ilə verilir. Bəzən isə sutka ilə suyun verilməsi dayandırılır. Bu da, haqlı olaraq Sumqayıt sakinləri tərəfindən tərəfindən böyük narazılıqla qarşılanır.
Xatırladaq ki, avqust ayını 7-də Su kanalı idarəsi tərəfindən şəhərin bir çox ərazilərində içməli suyun verilməsinin dayandırılması ilə bağlı xeberle.com saytının redaksiyasına rəsmi qaydada müraciəti daxil oldu. Hətta, suyun verilməsi bərpa edildikdən sonra da, yenidən redaksiyaya zəng edib bildirildi ki, artıq şəhərdə su kəsilən ərazilərdə suyun verilməsi bərpa edilib. Amma ötən gün avqust ayının 8-də axşam saalarında yenə şəhərin bir çox ərazilərində sular kəsildi. Bu barədə nə Sumqayıt şəhərinin DTV kanalında, nə də xəbər saytlarında şəhər sakinlərinə heç bir xəbərdarlıq edilmədi.
Məsələ ilə bağlı Sumqayıt şəhər Su kanalı idarəsinin rəisi Həmdulla Əliyev xeberle.com saytına bildirdi ki, bir gün öncədən yerli kanal vasitəsilə də, internetlə də şəhər sakinlərinə xəbərdarlıq edilib. İdarə rəisi bu dəqiqə suyu açdıqlarını, şəhər sakinlərinin su ilə təmin olunduqlarını söylədi. Cavabında bildirdik ki, hazırda 18 mk-da su yoxdur. H.Əliyev bizi inandırmağa çalışdı ki, iki saat müddətində sözugedən ərazi də su ilə təmin olunacaq.
Araşdırdıq ki, nə 17-ci mikrorayon, nə də 47, 48-ci məhəllələrdə suyun verilməsi hələ də bərpa edilməyib. Bizə iki saat müddətində 18-ci mikrorayon ərazisində də suların veriləcəyi bilidirilsə də, vəd edilən saatdan artıq 6 saat keçib. İki sutkadır Sumqayıt sakinləri içməli suya həsrət qalıb. Nə Sumqayıt şəhər su idarəsi tərəfindən suların hansı səbəbdən kəsildiyi ilə bağlı doğru- dürüst məlumat var, nə də sakinlərin içməli su ilə hansı saatda təmin olunacaqları ilə bağlı dəqəiq xəbər.
Aytən Əli, xeberle.com