Adi insanlar kimi onları da ad günlərində təbrik edir, hədiyyələr bağışlayırlar. Fərq yalnız ondadır ki, dövlət başçılarını hansı hədiyyə ilə təəcübləndirməyin mümkünlüyü olduqca müşkül məsələyə çevrilir. Bəlkə də siyasi liderlər üçün hədiyyə şeçimi zamanı təbrik edən şəxslər əməllicə baş sındırmalı olurlar. 

Modern.az saytı dövlət başçılarına hansı hədiyyələr verildiyini araşdırmağa çalışıb.

Rusiya Federasiyasının prezidenti Vladimir Putinin hədiyyə kolleksiyasında daha çox diqqəti çəkən bəxşiş ad günündə ona verilən pələng balasıdır. Hədiyyəni jurnalistlər qarşısında böyük həvəslə nümayiş etdirən prezident onun kim tərəfindən bağışlandığını sirr saxlayıb.

Ukraynanın sabiq başıbəlalı prezidenti Viktor Yanukoviç prezidentlik dövründə keçirdiyi son ad günündə qeyri-adi hədiyyənin sahibi olub. Ölkənin Milli Bankı tərəfindən prezidentə beş yüz qramdan artıq çəkisi olan qızıl sikkə hədiyyə olunub. Sikkənin bir üzündə iki qiymətli daşın arasında Yanukoviçin əksi həkk olunub, digər üzündə isə “uzun illər” ifadəsi yazılıb. Xatırladaq ki, sabiq prezident ölkəsini tərk edəndə həmin hədiyyəni götürməyə imkan tapmayıb.

Sadəliyi ilə fərqlənən Amerika Birləşmiş Ştatlarının prezidenti Barak Obama ötən il 52 yaşını qeyd edəndə xanımı Mişel Obama tərəfindən onun üçün çox dəyərli olan “sevgi etirafı” hədiyyəsini qazanıb. Birinci ledi Tvitter vasitəsi ilə prezidenti təbrik edib: “Barak, ad günün mübarək. Şaçların bir az ağarıb. Amma mən səni əvvəllər olduğundan da çox sevirəm!”. Mişel Obama təbrikə gənclik illərində birgə çəkdirdikləri ağ-qara şəkili də əlavə edib.

Belarus prezidenti Aleksandr Lukaşenkonun istifadəsində olan “Maybax” avtomobilini ona ad günündə Rusiyada yaşayan dostu hədiyyə edib. Prezidentin dediyinə görə o, digər siyasətçilərdən fərqlənməmək üçün bu maşından nadir hallarda istifadə edir. Lukaşenkonun sahibi olduğu “Maybax”ın qiyməti modelindən asılı olaraq 367 min avrodan 432 min avro arasında dəyişir.

Qazaxıstan prezidenti Nursultan Nazarbayev 73 yaşını qeyd edəndə çoxsaylı hədiyyələr arasında onu təəccübləndirən əllə toxunulmş 73 metrlik xalça olub. Bu xalçanın toxunulması üçün peşəkar xalçaçılar yeddi ay vaxt sərf ediblər. 


Svazilend kralı 3-cü Msvati 2007-ci ildə ad gününü qeyd edərkən özü-özünə hədiyyə etməyi qərara gəlib. Doğum günündə kral 13-cü dəfə evlənib. 19 yaşlı xanım Findayl Kembal onun üçün ad günündə ən qiymətli hədiyyə sayılıb.

Hədiyyələrdən imtina etməyən Rusiyanın baş naziri Dmitri Medvedev qiymətli bəxşişlərə bir o qədər də önəm vermir. Ad günlərində adəti üzrə dövlət tədbirlərini ixtisara salan baş nazir doğum gününü öz kiçik əhatəsi ilə qeyd etməyi sevir. Medvedevin daha çox qiymət verdiyi hədiyyələr disklər, kitablar, rəsm əsərləridir. Çoxsaylı hədiyyələrinin sırasında onun üçün daha dəyərli olan bəxşiş “Pavlovsk sarayı” əks olunmuş rəsmdir. Baş nazirin anası uzun illər həmin sarayda işlədiyindən bu əsər Medvedev üçün əziz sayılır.

Almaniyanın kansleri Angela Merkelə öz doğma vətənində ad gününü qeyd etmək çox vaxt nəsib olmur. Amma buna baxmayaraq rəsmi və qeyri-rəsmi səfərlərdə olarkən xanım siyasətçini doğum günündə hədiyyəsiz qoymurlar. Bu günə qədər ona bağışlanmış hədiyyələr arasında Merkel üçün daha maraqlısı yaxın ətrafı tərəfindən ad günü münasibətilə onun üçün hazırlanmış şəxsi saytdır.

Öz qeyri-adilikləri ilə dünya siyasətşiləri arasında fərqlənən Şimali Koreya lideri Kim Çen In ad günündə qiymətli bəxşişlər almaqla yanaşı, 10 yaşdan aşağı olan bütün uşaqlara bir kiloqram konfet sovqatı göndərib. Bu ənənə 1980-ci ildən Kim İr Sen tərəfindən qoyulub. Gənc siyasətçi “səxavətli lider” imicini yaratmaq üçün ənənəni uğurla davam etdirir. 


Azərbaycan Prezidenti İlham Əliyevə də indiyədək çoxlu hədiyyələr verilib. İlham Əliyevin hədiyyə koleksiyasının çox zəngin olduğu şübhəsizdir. Prezidentin aldığı hədiyyələrdən biri də ölkədə dini-mənəvi dəyərlərin qorunmasındakı xidmətlərinə görə Şeyxülislam Hacı Allahşükür Paşazadənin verdiyi müqəddəs Quran kitabıdır.

Dünyasını dəyişib, dəyişməməyindən asılı olmayaraq dövlət başçılarına verilən hədiyyələrdən söhbət gedirsə Leonid İliç Brejnevi xatırlamamaq haqsızlıq olar. Çünki Leonid İliçin hədiyyələrə qarşı adi marağı yox, çılğın ehtirası olub. Bir çox hallarda Baş katib arzuladığı hədiyyəni əldə etmək üçün fikrini bildirməkdən də çəkinməyib. Təkcə şəxsi hədiyyələr onu qane etməyib, mütləq şəkildə hədiyyələrlə yanaşı, dövlət mükafatları və yüksək təltiflər Brejnevin “hədiyyə kolleksiyasını” zənginləşdirib. Bu haqda oxuculara ətraflı yazı təqdim edəcəyik.