“Hazırda məktəb direktoru kimi çalışan və gələcəkdə məktəbi idarəedən kimi işləmək istəyən kadrlar üçün aparılan təlim kursları başa çatıb”.

Bunu Təhsil Nazirliyinin Təhsil keyfiyyətinin qiymətləndirilməsi sektorunun müdiri Emin Əmrullayev bildirib. O qeyd edib ki, noyabrdan başlanan bu təlimlər bu gün artıq tam yekunlaşıb: “I mərhələdə 200-ə yaxın kadrın ərizəsi qəbul edilib, onlardan 172 nəfəri imtahana, 80 nəfərə qədəri isə müsahibəyə buraxılıb. Ümumilikdə, yekunda 53 nəfər təlimdə iştirak edib. Təlimlər zamanı onlara kurikulum, təhsillə bağlı ətraflı məlumatlar verilib. Təlimdə iştirak edən 52 nəfər müdavim yekun qiymətləndirmədə iştirak edib. İmtahan nəticələri bu həftə məlum olacaq və onlar uğur sertifikatı ilə mükafatlandırılacaq. Sonradan Bakı şəhərində mövcud olan və gələcəkdə yaradılacaq rəhbər vəzifələrə təyinatlar zamanı üstünlük bu şəxslərə veriləcək. Bu tipli layihələr təhsilin keyfiyyətinin qaldırılmasına, təhsil islahatlarının keyfiyyətli həyata keçirilməsinə yardım edəcək”.

Sektor müdiri onu da əlavə edib ki, qeyd olunan təlimlər direktorların öz işlərini daha səmərəli qurması və gələcəkdə yarana bilən vakansiyaları doldurmaq məqsədilə aparılır. Bunun attestasiya xarakterli olmadığını deyən nazirlik rəsmisinin sözlərinə görə, Azərbaycanda təxminən 4500-ə yaxın orta məktəb var: “Təhsil Nazirliyi tərəfindən həmin təhsil müəssisələrinin keyfiyyət göstəriciləri müəyyən olunur və bu barədə müvafiq qurumlara məlumat verilir. Müxtəlif səbəblərə görə məktəblərdə vakant direktor yerləri də yaranır. Hazırda həyata keçirilən layihə pilot xarakterlidir”.

E. Əmirullayev onu da vurğulayıb ki, Təhsil Nazirliyi tərəfindən direktorların işə qəbulu qaydaları hazırlanır. “Düşünürəm ki, cari ilin sonuna kimi, növbəti tədris ilindən bu istiqamətdə də bəzi yenilikləri ictimaiyyətə çatdıra biləcəyik”.(lent.az)