"Azərbaycanda internetin kəsilməsi ölkənin informasiya təhlükəsizliyi üçün ciddi təhlükədir”
Bu barədə Azərbaycan İnternet Forumunun prezidenti Osman Gündüz bildirib.
AİF rəhbərinin sözlərinə görə, son illərdə ölkənin milli informasiya fəzasının formalaşması istiqamətində müəyyən işlər görülüb.
"Dövlət və özəl sektorda informasiya təhlükəsizliyinin möhkəmləndirilməsi üçün müəyyən addımlar atılıb. "Delta Telecom” tərəfindən Azərbaycan İnternetinin qlobal dünyaya bir neçə fərqli magistral kanallar üzərindən bağlantısının qurulması istiqamətində son illərdə atdığı addımları da müsbət dəyərləndirilir.
Buna baxmayaraq baş verən hadisə onu göstərir ki, atılan addımlar yetərli deyil və ölkənin informasiya təhlükəsizliyi məsələsinə daha konseptual yanaşmaq vacibdir”.
Mütəxəssis hesab edir ki, dövlət internet probleminin təkrarlanmaması üçün dərhal ciddi tədbirlər görməli, bu sahədə rəqabətli mühitin, alternativlər üzərində infrastrukturun formalaşması üçün tədbirlər görməlidir.
"Müasir dövrdə informasiya təhlükəsizliyinin milli təhlükəsizliyin əsas tərkib hissəsi olmasını nəzərə alaraq Azərbaycan İnternet Formu ölkənin dayanıqlı informasiya təhlükəsizliyi sisteminin, informasiya infrastrukturunun alternativ təchizatlar və alternativ informasiya şəbəkələri üzərində qurulmasını zəruri hesab edir.
Hesab edirəm ki, dövlət və ictimai sektorda bir müddət müzakirə olunan yeni milli informasiya təhlükəsizliyi konsepsiyasının hazırlanması məsələsinin yenidən gündəmə gətirilməlidir. Bu kimi halların bir daha təkrarlanmaması üçün, ən qısa 2-ci səviyyəli provayderlərin, daimi onlayn əlaqənin əhəmiyyətli olduğu qurumların da informasiya şəbəkəsinin alternativlər üzərində qurulması vacibdir”.
O. Gündüz baş verən hadisənin səbəbləri haqqında ictimaiyyətə rəsmi açıqlamanın verilməsinin vacib olduğunu bildirib.
Qeyd edək ki, ötən gün Azərbaycanda ciddi internet problemi yaşanıb. Ölkə ərazisində 6 saat internet olmayıb.(azvision)
Xəbərdən istifadə edərkən istinad etmək vacibdir.
