Azacıq yağış yağan kimi valideynlər az qalırlar, övladlarını məktəbə qucaqlarında aparsınlar

Sumqayıt şəhərinin bəzi mərkəzi küçələrində təmir-bərpa işləri aparılır. Amma şəhərin elə yerləri var ki, Sovet dövründən bu yana bir dəfə də olsun təmir üzü görməyib. Belə ki, 17-ci mikrorayonda yerləşən 39 saylı tam orta məktəbə gedən yol demək olar ki, ucqar kənd yollarını xatırladır. Sakinlərin söylədiyinə görə, azacıq yağış yağan kimi az qalırlar, övladlarını məktəbə qucaqlarında aparsınlar ki, məktəblinin üst-başı, çantası palçığa batmasın. Məktəbə gedən yol yalnız piyada yolu olduğu üçün vəziyyət daha da acınacaqlı olur. Onlar Xeberle.com portalına bunları söyləyiblər: 

"Sumqayıt aparılan tikinti-bərpa işlərini gördükdə açığı çox sevinmişdik. Bir anlıq da olsa, bizim də məhəllədaxili yollarımızın təmir olunacağı kimi xəyallara daldıq. Amma görünür, Sumqayıt şəhər 17-ci mikrorayonda yüksək vəzifəli məmur, yaxud da məmurun uzaq da olsa, bir qohumu yaşamır ki, bizim də atımızın alnına gün doğa”.
Şikayətçilər bildirir ki, yolun yaxşı yerinə asfalt vurulur, amma yolun bərbad hissəsinə asfalt vurulmur, qonşu küçələr artıq ağ günə çıxıb. Asfalt da çəkilib, səliqə-səhman da yaradılıb. Nədənsə, bu diqqət sözügedən küçədən yan keçib.
Hətta sakinlər böyük narazılıqla bildirdilər ki, sözügedən ərazidən çox da uzaqda olmayan 18-ci mikrorayonda yeni asfalt yollar salınır, nümunəvi məhəllələr inşa edilir, dam örtükləri yenilənir, bəs bizim mikrorayon niyə diqqətdən kənarda qalır?! Burda yalnız bir fikir insan beynini narahat etməyə bilməz. Bəlkə 17-ci mikrorayona göstərilən ögey münasibətin özəl səbəbləri var, yoxsa günü gündən abadlaşan şəhərimizin bir parçası olan bu ərazi niyə diqqətdən kənarda qalsın ki?!
Nəzərə alsaq ki, qış fəslidir, havalar yağışlı yağmurlu keçir, deməli, 17-ci mikrorayon sakinləri də palçıqda özlərinə cığır açmağa məcburdurlar. Ən azından sözügedən əraziyə aidiyyəti qurum rəhbərlərinin yolu düşənə qədər.
Xeberle.com