Bəzi praktik məlumatlardan xəbərdar olmağınız kifayətdir ki, pulunuza qənaət edəsiniz. Yaşadığınız və səyahətə başlamaq istədiyiniz şəhərdən getmək istədiyiniz şəhərə reyslər təşkil edən bütün aviaşirkətlərin məlumatlarını tapa biləcəyiniz saytlar vardır. Həmin saytlarda siz məsələn Bakıdan Berlinə uçan bütün aviaşirkətlərin vaxtlarını, qiymətlərini, çatma intervalını və s. rahatlıqla tapa bilərsiniz. O saytları mütəmmadi izləsəniz qiymət dəyişməsini görə bilərsiniz, hətta ucuz bilet də tapa bilərsiniz. Məhdud büdcə ilə səyahət etmək üçün isə başqa rahat yollar da var. Beləliklə… 

1.   Bəzi yerlər var ki, onlara yalnız mövsüm vaxtı yox, başqa vaxtlarda da gedə bilərsiniz.

Səyahət mövsümləri vaxtı qiymətlər həmişə yüksək olur. Qiymət yüksək, yer tapmaq çətin, gəzəcəyiniz yerlərdə də turist əlindən tərpənmək olmur. Mövümdən kənar gedəcəyiniz yerlərdə bu problemlərin heç biri olmayacaq. Buna görə də, işdən tətil vaxtınızı hamının istirahətə getdiyi vaxtda yox, fərqli vaxtlarda götürün. 

2.   Həftə içi səyahətlər daha məqsədəuyğundur.

Həftə sonları daha çox insan istirahətə gedir, buna görə də həftə sonu qiymətlər digər günlərə nisbətən baha olur. Bu, əsasən getdiyiniz yerdə qalacağınız məkanlara aid olsa da, çox vaxt nəqliyyat qiymətlərində də belə olur. Ən əsası - həftə içi ucuz təyyarə bileti tapmaq üçün ən uyğun vaxtdır. Cümə, şənbə və bazar günləri biletlərin çox alındığı vaxtlar olduğuna görə, səyahətlərinizi həftənin digər 4 gününə salmağa üstünlük verin. 

3.   Çalışın özünüz öz aşpazınız olun.

Səyahətə getdiyiniz yerdə seçim edərkən "Apart” hotel növünə üstünlük verin. Öz ağız dadınıza uyğun yeməklərinizi özünüz bişirin. Yemək də daxil olmaqla götürdüyünüz hotel nömrəsi, adi otaqdan daha baha olacaq. Üstəlik, bu fərq hiss olunacaq dərəcədə çoxdur. Səyahət vaxtı yemək bişirmək istəmirsinizsə, qənaət etdiyiniz pulla gələn dəfə Maldivə belə gedə biləcəyinizi fikirləşərək özünüzdə stimul tapa bilərsiniz. Artıq xarici ölkələrdə ekspress marketlərin sayı artmaqdadır. O marketlərdən çox ucuz qiymətə ərzaq, hətta hazır yeməklər ala bilərsiniz. Yaxud da getdiyiniz şəhərin bazarlarına baş çəkin, ucuz və təzə ərzaq tapa biləcəyiniz ən uyğun yerlər oradır. 

4.   Yerli əyləncə və şənliklər tapmağa çalışın

Getdiyiniz yerlərdə şədər idarələrinin və yerli camaatın özünün təşkil etdiyi pulsuz əyləncə proqramlarını axtarıb tapın. Həmçinin xarici ölkə şəhərlərinin çoxunda şəhər meriyası müdəmmadi olaraq pulsuz şəhər turları təşkil edir. Maraqlı əyləncə proqramları tapsanız, tətiliniz də maraqlı keçəcək. Hətta smartfonunuz üçün belə tətbiqlər də var. Onları yükləməklə internetə çıxışınızın olmağı kifayətdir ki, olduğunuz məkanda çoxlu ucuz əyləncə məkanları tapa bilərsiniz. 

5.   Getdiyiniz şəhərin mərkəzində bağlanıb qalmayın.

Getdiyiniz yerlərdə şəhərlərin kənarlarında da çoxlu gəziləcək yerlər var. Yemək, içmək, əyləncə, alış-veriş üçün belə yerlər daha ekonomikdir. Bu fürsətləri həmin şəhərin adıyla yaradılmış Facebook və ya İnternet səhifələrində tapa bilərsiniz, amma unutmayın: səyahət etmək istədiyiniz şəhəri əvvəlcə onlayn məkanda yaxşıca araşdırın. Əmin olun ki, çox lazımlı məlumatlar tapa biləcəksiniz.

6.   Ucuz təyyarə biletini "göydə tutun”.

Xarici səyahətlərdə ən çox pul aparan məsələ təyyarə biletinin qiymətidir. Büdcənizə uyğun bilet tapmaq üçün İnterneti bolluca araşdırın. Müxtəlif saytların təkliflərini müqayisə edin. Eyni istiqaməyə fəqli qiymətlərlə uçan aviaşirkətlər mütləq tapacaqsınız. Həmişə bir aviaşirkətlə səyahət etməyin, adını heç vaxt eşitmədiyiniz etibarlı aviaşirkət də tapa bilərsiniz. Qısası bu istiqamətdə də vərdişlərinizi dəyişib, yeniliklərə açıq olmağa çalışın. 

7.   Çevik olun – səyahəti əvvəlcədən planlaşdırın

Əgər tətil vaxtınızı əvvəldən müəyyənləşdirib çevik olsanız, gedəcəyiniz vaxt üçün uzun müddət öncədən çox ucuz bilet və qalmağa yer tapa bilərsiniz. Yaxud da növbəti il üçün getmək istədiyiniz yeri İnternetdə araşdıran zaman bütün fürsətləri dəyərləndirin. Yaşadığınız şəhərdən həmin şəhərə gedə biləcəyiniz endirim kampanyalı təyyarə biletlərini çox əvvəldən elan edirlər. Hətta səyahətinizi həmin kampaniyalara görə də müəyyənləşdirə bilərsiniz, yalnız iki tarix arasında qalıb özünüzü çətinə salmayın. Dəyişdirə bilmədiyiniz səyahət vaxtlarına görə, artıq pul ödəyəcəksiniz. 

8.   Populyar istiqamətlərdən kənara çıxın

Məşhur məkanlar hər kəsin diqqətini cəlb edir. Halbuki bu məkanlardan başqa görə biləcəyiniz o qədər maraqlı yerlər var ki. Məşhur turist dayanacaqları həmişə daha bahalı olur. İstiqamətinizi başqa yerə yönəltməyiniz yalnız puldan qənaət edəcəksiniz demək deyil, həm də heç eşitmədiyiniz çox daha gözəl yerlər kəşf edə bilərsiniz. Səyahət bloqlarını mütləq izləyin, orda heç görmədiyiniz məkanlar haqqında bol məlumat ala bilərsiniz. 

9.   Səyahətə çıxan vaxt «yüngül» olmağa çalışın

Əslində bu səyahətə gedənlər üçün «qızıl qayda» sayılacaq bir şərtdir. Çamadanınıza doldurduğunuz əşyalara diqqətlə baxın – onların çoxuna tətil vaxtı heç ehtiyacınız olmayacaq. Fikir verin, çoxunu ya bir dəfə istifadə edəcəksiniz, ya da heç istifadə etmədən geri qaytadacaqsınız. Hətta biraz da diqqətlə yanaşsanız, qarderobunuzda da belə əşya və geyimlərin olduğunu görəcəksiniz. Bunu əbəs yerə demirik, məsələn həmin əşyalara xərclədiyiniz pulla həftə sonu yaxın bir yerə «qaça bilərsiniz».  Xatirə toplamaq, lazımsız əşyalar toplamaqdan daha yaxşıdır. Ağır yük sağlalığınıza, «ağır bilet» də büdcənizə zərərlidir. Əksər aviaşirkətlət əlavə yük üçün əlavə pul alır, bunu unutmayın. 

10. Erkən rezervasasiyanı həmişə diqqətdə saxlayın

Əvvəldən reservasiya bizim insanlara çox xas olan bir xüsusiyyət olmadığı üçün ilk dəfədən qulağa xoş gəlməyə bilər. Son 5 ildir, bu adət bir çox ölkələrdə vərdiş halını almağa başlayıb. Təbii, işləyən təbəqə üçün erkən reservasiya bir az riskli addımdır. Bununla belə,  əvvəldən reservasiya edənlər, son dəqiqə səyahətə çıxmağa qərar verənlərdən hər mənada daha qazanclıdırlar. Mövzu səyahət etməkdirsə, sərhədləri bacardığınız qədər genişləndirin. Bununla belə öz üsullarınızla da pul yığmağın minlərlə yolu var. Öz üsulunuzu özünüz də yarada bilərsiniz. (Fins.az)