“Veysəloğlu” Şirkəti Əmək və Əhalinin Sosial Müdafiəsi Nazirliyinin sabiq mətbuat xidmətinin rəhbəri İlham Məmmədova vəzifə verdi.

AzVision.az-ın əldə etdiyi məlumata görə, nazirliyin keçmiş İctimaiyyətlə əlaqələr şöbəsinin müdiri İlham Məmmədov bundan sonra fəaliyyətini “Veysəloğlu” sirkətində eyni adlı şöbənin rəhbəri olaraq davam etdirəcək. 

İlham Məmmədov ilə əlaqə saxlayaraq yeni vəzifə təyinatına münasibət öyrənməyə çalışdıq. İ.Məmmədov “Veysəloğlu” Şirkəti tərəfindən İctimaiyyətlə əlaqələr şöbəsində müdir vəzifəsinə dəvət aldığını və bu şirkətdə işləyəcəyi qərarını verdiyini bildirib:

“Bu şirkətdə işləməkdən məmnunam və çox sevindirici haldır ki, ölkəmizdə dəyərlər üzərində qurulmuş və hər zaman işçilərinin qayğısına qalan bu kimi şirkətlər fəaliyyət göstərir. Bu ölkəmizdə sahibkarlığın inkişafına verilən dövlət dəstəyi və özəl sektorun da bunu nəticəsində ölkə iqtisadiyyatina, cəmiyyətə verdiyi töhvədir. Dövlət və ya özəl sektorda fəaliyyət göstərməyindən asılı olmayaraq əsas məqsəd təmsil etdiyin quruma layiqli bir işçi olmaqdır.”

Qeyd edək ki, İlham Məmmədov 2000-2010 illər ərzində “Azadinform” İnformasiya Agentliyinin İqtisadiyyat şöbəsinin müdiri olub. 2007-2008-ci illərdə “Yeni İqtisadiyyat” jurnalında informasiya şöbəsinin müdiri kimi çalışıb. 2010-2011-ci illər ərzində Əmək və Əhalinin Sosial Müdafiəsi Nazirliyinin Ümumi şöbəsində məsləhətçi, 2011-2012-ci illər ərzində nazirliyin İctimaiyyətlə əlaqələr şöbəsi müdirinin müavini və ictimaiyyətlə əlaqələr sektorunun müdiri vəzifəsində fəaliyyət göstərib. 2012-ci ildən 2014-cü ilin əvvəlinə kimi isə Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsində şöbə müdiri vəzifəsində çalışıb.