Fuad Niftəliyev (26 yaş, “Nano electronic” mağazalar şəbəkəsinin satış müdiri):

    - Mən bu yay istirahətimi ölkə xaricində etməyi qərara almışam. Avqust ayının ilk həftəsində yaxın dostlarımla birgə Gürcüstanın Batumi şəhərində istirahət etməyi planlaşdırmışam. Büdcə olaraq bu yaya digər biznes planlarım olduğu üçün elə də çox xərcləməyi düşünmürəm. 1 həftəlik istirahətim üçün400-600 AZN civarında pul ayıracam. Hər kəsə bu yayda xoş istirahətlər arzulayıram.

Günel Yaqublu (19 yaş, BDU-nun tələbəsi):

     - Bildiyimiz kimi, iyun-iyul aylarında universitetlərdə imtahanlar olur. İyun ayı bəzi insanlar üçün istirahət ayı olsa da, biz yayın qızmar günlərində imtahanlara hazırlaşırıq. İyunun sonuna kimi imtahanlar, daha sonra praktikamız başlayacaq. Coğrafiya fakültəsində oxuduğuma görə Altıağaca praktikaya gedəcəyik. Deyəsən, istirahət ordan başlayacaq. 1 həftə orda olduqdan sonra, 5 il getmədiyim doğma yurdum Yardımlıya getmək fikrim var. Büdcə barədə isə hələ düşünməmişəm.

Xatirə Süleymanova ( 43 yaş, Sumqayıt Musiqili Dram Teatrının aktrisası):

    - Bu yay tətilim bütünlüklə oğlumun qəbul prosesilə bağlıdır.Tələbə adı qazanarsa, bu mənimçün ən böyük istirahət olacaq. “Bir ailəm var”  serialından qazandığım bütün pulları balalarıma sərf edəcəm..

Təki dunyamız salamat olsun! Balalarım da xoşbəxt olsun. 

Çinarə Vaqif (30 yaş, Mədəniyyət İşçiləri Həmkarlar İttifaqının Sumqayıt şəhər Təşkilatı Gənclərlə iş üzrə komissiyanın sədri):

    - Mən bu yay istirahət edə bilməyəcəyəm, amma buna qətiyyən təəssüflənmirəm. Çünki bir jurnalist kimi biliyimi təkmiləşdirməkçün 3 ay "ABŞ-ANS Jurnalist Akademiyası " nda təhsil alacağam. Artıq 1 ayı geridə qoymuşam 2 ay qalıb. Akademiyada yerli və Amerikadan gəlmiş peşəkar jurnalistlərdən dərs alıram. İnşallah, məzun olduqdan sonra yaxşı istirahət edərəm. Amma buna baxmayaraq, həftə sonları Vətənimizin olmadığım rayonlarına təbii ki, dostlarla tur səfərlərimiz olur. Əgər 1 yay məzuniyyəti dövründə 1 aylıq harasa istirahətə getsəydim, çox güman ki, bu mənə daha ucuz başa gələrdi, nəinki hər həftə sonu. Çünki hər səfərə ən az 50 AZN xərcləməli oluram. İstirahət üçün xaricə üz tutmağa dəyməz, gözəl məkanlarımız çoxdur. Hər kəsə xoş istirahətlər!

Alı Əliyev (37 yaş, mühafizəçi):

    - Hər il olduğu kimi bu il də istirahətimi evdə keçirəcəm. Çünki gəlirlərim elə də yüksək deyil ki, istirahətimə ayıra bilim. Ailəmə güclə çatır.

Zaur Əhməd (31 yaş, jurnalist):

    - Mənsub olduğum Cəbrayıl rayonu işğal olunduğundan kəndimizə getmək imkanım yoxdur. Ancaq çalışacam ki, bir neçə günlük də olsa da, ailəmlə birgə hansısa rayona gedim.

Büdcə hələ yoxdur. Amma 300 manatdan yuxarı olmaz.

Xəyal Şükür (27 yaş, “AzadXeber” İnformasiya Agentliyinin əməkdaşı):

    - Hər yay adətən işimizlə əlaqədar olaraq təxminən 10 gün müddətinə qədər istirahət etmək imkanımız olur. Lakin tətil günləri üçün xüsusi yer və məkan müəyyənləşdirməmişəm. Mümkündür ki, istirahətimin bir neçə gününü Sumqayıtda, ailəmlə birgə keçirdikdən sonra 3-4 günlük də olsa, Qəbələyə qohumlarımızgilə gedək.

Düzünü desəm, büdcə məsələsi bir qədər təbəssüm doğuracaq sualdır. Ümumiyyətlə, mövcud Azərbaycan insanın həyat şəraitinə və iqtisadi durumuna nəzərə alsaq, hər il istirahət üçün müəyyən bir büdcənin ayrılmasının cəmiyyətin əksər üzvlərinə yad bir ünsür olduğunu başa düşərik. Səbəb isə cəmiyyətimizin ağır şərtlər altında işləyərək, başdan ayağa qədər kreditləşməsi, bütün qazancının banklara və digər sosial qayğılarına qənaətlə xərcləməsindədir. Amma hər bir halda, bu ay istirahətim üçün kredit də olsa, 200-300 manat ayırmaq fikrindəyəm.

  Ceyhun Hüseynzadə ( 24 yaş, Sumqayıt sakini):

    - Bu yay 7-15 yaşlı uşaqlar üçün yay məktəbi təşkil etmişik. Məqsəd yeniyetmələrin dil inkişaflarını yaxşılaşdırmaq üçün ingilis dilli yay məktəbləri keçirtmək və başladığımız işi uğurla sona çatdırmaqdır. Buna görə də böyük ehtimalla yayı iş başında keçirəcəyik.

  Dilarə Səlimova (51 yaş, təqaüdçü):

   - Təqaüdçü hara, dincəlmək hara...

Əlbəttə ki, evdə olacam. Çünki təqaüdümüz elə çox deyil ki, istirahətimə də ayırım. Uşaqlarımın himayəsində olmasam, bu pensiya ilə 1 həftədən artıq yaşaya bilmərəm. Günü-gündən də ərzaq bahalaşır...

 Zeynəb Abdullah ( 23 yaş,  “Xeberle.com”-un əməkdaşı):

    - Çox istərdim ki, bu yay Qəbələyə gedim. Düzdür, orada qiymətlər baha olduğundan hər il arzum baş tutmur.

Alinmasa isə doğulduğum Oğuz rayonuna üz tutacam.

Bəzən insan istəyir ki, hamıdan uzaq olan bir yerə istirahətə getsin. Amma doğmaların yanındadısa, bu, elə ən gözəl istirahətdir.

Onu da deyim ki, əgər yayda istirahətə işdən vaxt ayıra bilmirsənsə, hər axşamı elə yaşadığın yerin parkında velosiped sürməklə, dəniz kənarında gəzmək və axşamlar dostlarınla görüşüb birlikdə çay içməklə də keçirmək olar.

Əgər maraqlı insansansa, büdcəndən və yerindən asılı olmayaraq istirahət etməyə məşğuliyyət tapacaqsan.

 Seymur Bayramov (25 yaş,  “Qarabağ Araşdırmalar Mərkəzi”nin sədri):

    - Uzun və gərgin iş həyatına qısa ara vermək, əlbəttə ki, yeni və daha yaradıcı ideyaların formalaşmasına təkan verir. Məhz uğurlarımın sayı və əhatəsini genişləndirmək üçün bu yay mövsümündə daha səmərəli istirahət planlaşdırmışam. Azərbaycanın bütün bölgələrini sevərək gəzmişəm və gözəlliklərin canlı şahidi olduğuma görə istirahətimin ilk mərhələsini Azərbaycanımızın ən gözəl guşələrindən hesab olunan cənub bölgəsində istirahət edəcəm. Bu istirahətimiz üçün 600-700 AZN nəzərdə tutmuşam.

Ancaq əlbəttə ki, çimərlik mövsümünün başlanmasını hər bir kəs kimi mən də səbirsizliklə gözləyirəm. Bağ mövsümünü çox sevdiyim üçün istirahətimin əsas hissəsini bağda keçirəcəm. Və bir neçə günlük Türkiyənin Qara dəniz bölgəsi Samsunda istirahət nəzərdə tutmuşam. Bunun üçünsə yenə də, 700-800 AZN nəzərdə tutmuşam. Bütün dostlara xoş və səmərəli istirahət diləyi ilə...

 Səmayə Bədəlova ( 39 yaş, müəllimə):

    - Mən bu yayı ailəmlə birlikdə Türkiyədə keçirəcəm. Düzü, biz Türkiyədə 2 dəfə olmuşuq, amma uşaqlarım oranı çox bəyəndiyindən bu il Antaliyaya yenidən gedəcəyik.

 Elxan İsayev (40 yaş, fəhlə):

-         Nə danışırsan a kişi, fəhlə babayam. Pul var ki, istirahət üçün də büdcə ayıraq?!

(168saat.com)