SDU elmi dərəcəsi olan kadrları işə dəvət edir

Sumqayıt Dövlət Universiteti şəhərimizin ən iri təhsil ocağı, yeganə universitetidir. Bu universitetdən həmişə böyük gözləntilər olub, bu gün isə tələblər və gözləntilər bir az da artıqdır. Xüsusilə kadr dəyişikliklərindən sonra nazirliyin universitet qarşısında yeni vəzifələri müəyyən edilib. Bəs görəsən, bu vəzifələr necə icra olunur? Universitetdə hansı dəyişikliklər var? Bu təhsil ocağını yaxın gələcəkdə hansı yeniliklər, layihələr gözləyir? Bütün bu suallara universitetin prorektoru Nizami Namazovla birgə aydınlıq gətirməyə çalışmışıq.

- Bu yaxınlarda təhsil naziri Mikayıl Cabbarov universitetdə olmuşdu. Həmin səfər zamanı nazir universitetin yeni rəhbərliyi qarşısında hansı tələbləri qoydu, nələr müzakirə olundu?

- Dövlətimizin başçısının sərəncamı ilə cənab Elxan Hüseynovun universitetimizin rektoru təyin olunmasından sonra bu səfər gerçəkləşdi. Cənab nazir hörmətli rektoru universitet kollektivinə təqdim etmək üçün gəlmişdi. Bu tədbirdə Sumqayıt şəhər İcra Hakimiyyətinin başçısı cənab Eldar Əzizov da iştirak edirdi.

Təhsil nazirimiz qarşıda yeganə bir vəzifə qoydu. Universitetdə keyfiyyətli təhsil verilməli, ölkəmizin sabahı naminə kadr hazırlığına çox ciddi surətdə fikir verilməlidir, şəffaflıq təmin olunmalıdır. Həm cənab nazirin, həm də cənab başçının tələbi bu oldu.

Köhnə, artıq yola salınmış rəhbərliyin, həmin komandanın yol verdiyi səhvləri təkrarlamamaq, o səhvlərdən nəticə çıxarmaq da xüsusi tələb kimi qoyuldu.

- Bu səfərdən əvvəl və sonra universitetdə müəyyən kadr dəyişikliklərinin olduğunu bilirik. Konkret olaraq kimlər vəzifələrindən azad edildi?

- Keçmiş rektorumuz Nadir Qəhrəmanov səhhəti ilə əlaqədar olaraq istefa vermişdi. Eyni zamanda, tədris işləri və elmi işlər üzrə prorektorlarımız professorlar Əkbər Ağayev və Yadigar Hüseynov öz ərizələri ilə, cənab nazirin əmri ilə vəzifələrindən azad olundular. Onlar həm də kafedra müdiri vəzifəsini tuturdular və bu vəzifələrində bu gün də qalmaqdadırlar. Digər prorektorlara öz işlərində dönüş yaratmaq üçün şans verilmişdi, ancaq görünür, rəhbərliyi sonra onların da işi qane etmədiyindən – qiyabi təhsil üzrə prorektor Qafar Ramazanov, həmçinin təsərrüfat işləri üzrə prorektor Şirin Cəfərov da tutduqları vəzifələrdən öz ərizələri ilə azad olundular. Onlara tövsiyə olundu ki, əgər rəhbərliyin tələb və vəzifələri sizi qane etmirsə, buyurub, ərizə təqdim edə bilərsiniz. Onlar da belə etdilər, ancaq müəllim kimi işlərinə davam edirlər və onların müəllimlik fəaliyyətinə qarşı heç bir irad yoxdur.

Bundan başqa, Ümumi Şöbənin müdiri Sevil Lətifova, Magistratura və doktorantura şöbəsinin müdiri Kamal müəllim də öz ərizələri ilə işdən azad olundu.

- Sonuncu ildə universitetin təhsil və elm həyatında hansı nailiyyətlər əldə olunub?

- 2014/15 tədris ilinin birinci yarısında universitetdə yoxlamalar başlandı, daha sonra isə nəticədə, köhnə komanda istefa verməli oldu. Odur ki, son 6 ay ərzində nailiyyətlərdən danışmaq daha asandır. Bu dövrdə əvvəllər buraxılmış bir sıra səhvlər var idi ki, ilk növbədə həmin səhvlərin aradan qaldırılmasına çalışıldı. Artıq qış imtahan sessiyasında kifayət qədər şəffaflığa nail olundu: imtahanların keçirilmə qaydalarında, yoxlanma forma və mexanizmlərində müəyyən dəyişikliklər edildi. İmtahanlardan narazı qalan tələbələrin müraciətinə baxan appilliyasiya komissiyasının işinin obyektivliyi təmin olundu. O vaxt Elxan müəllim rektor əvəzi di, ancaq daxili əmrlə bu dəyişiklikləri həyata keçirdi.

Qış imtahan sessiyasından sonra tətil dövründə tələbələrin asudə vaxtının təşkili üçün onların mədəni-kütləvi tədbirlərdə iştirakı təmin olundu.

Yaz semestri ərzində də dərslərin yüksək keyfiyyətlə keçirilməsi üçün bir sıra tədbirlər həyata keçirildi: frontal yoxlamaların aparılması, açıq dərslərin təşkili, təlimdə yeni texnologiyaların tətbiqi və s. 

Kitabxanamızın fondu elə də zəngin deyildi. Bu sahədə də lazımi işlər görüldü, xüsusilə onu qeyd edim ki, kitabxananın elektornlaşdırılması olduqca mühüm hadisə idi. 1000-dən çox kitab tamamilə elektron formada artıq təqdim olunur.

Tələbələrin dərsə davamiyyəti, nizam-intizamın yüksəlməsini də vurğulamaq lazımdır. 

Eyni zamanda tikinti-abadlıq istiqamətində ciddi işlər göürülüb. Birincisi, əsas korpusda istilik sistemi tamamilə yenilənib və bütün universiteti istiliklə təmin edə biləcək qazanxana qurulub. İkincisi, 20-yə qədər yeni auditoriya istifadəyə verilib. 6-sı əsas korpusda tikilib, 14-ü isə istifadəyə yararsız tələbə yeməkxanası tam təmir olunaraq yaradılıb.

Üçüncüsü, sanuzellər tam müasir formada təmir olunub, 4 sayda isə yeni sanitar-gigiyena otağı yaradılıb. Və nəhayət, universitetin elektrik şəbəkəsi və kabel sistemi tamamilə yenilənib.

Hazırda dərslərin bitməsi ilə bağlı olaraq demək olar ki, bütün auditoriyalarda, kabinetlərdə, laborotoriyalarda, hər iki tədris binasının damında və fəsadında təmir işləri aparılır, eləcə də universitetin həyətyanı ərazisi yaşıllaşdırılır və abadlaşdırılır.

Ən vacib məsələlərdən biri isə odur ki, Heydər Əliyev Mərkəzinin yaradılması üzərində iş gedir.

- Qeyd etdiniz ki, şəffaflığın təmin olunması istiqamətində mühüm tələblər qoyulmuşdu və bu baxımdan işlər həyata keçirilir. Arabir bəzi internet saytlarda universitetdə rüşvət halları ilə bağlı məlumatlara rast gəlirik. Bu məlumatlara reaksiyanız necədir?

- Birincisi, şəffaflığın hansı formada, necə, hansı səviyyədə təmin olunmasından danışım, sonra siz görün, bu yazılanlar barədə danışmağa yer qalır, ya yox?! Tələbə öz biliyi, başı və cibində qələmi ilə girir imtahana. Onlara nəzarətçilər nəzarət edir ki, onlar ixtisasca müəllim deyillər, universitetin başqa sahələr üzrə əməkdaşlarıdır. İkincisi, o nəzarətçilərin özünə də nəzarətçilər var – onlar nəzarət komissiyasının üzvləridir, köçürmə və digər neqativ halların qarşısı maksimal dərərəcədə alınır. Əgər kimsə imtahanda köçürməyə çalışırsa, həmin tələbə imtahandan çıxarılır.

İmtahanın nəticələri, tələbələrin cavabları kodlaşdırılır. Monitorinq komissiyası bu kodlaşdırmaya nəzarət edir, cavabları isə imtahan vermiş qrupun müəllimi yoxlamır. Üstəgəl, müəllim tələbəni tanıyırsa da, onu xəttindən tanıya bilməz. Yəni imtahanlarda, belə demək mümkünsə, məxfilik var.

Ölkəmizdə demokratiya, söz azadlığı var, kim nə istəyir yaza bilər. Əgər kimdəsə belə faktlar varsa, qoysunlar ortaya. Yaxşı, sadəcə, desinlər ki, kimə pul veriblər, hansı işi başqa yollarla həll ediblər. Biz də bilək, tədbir görək.

Qış imtahan sessiyasında iki bu cür fakt aşkarlanmışdı və həmin müəllimlər tutduqları vəzifələrdən azad olundular. Rektorumuz obyektiv adamdır və əgər hansısa müəllim tələbədən pul tələb edirsə, dərhal bu barədə ölçü götürülər.

- Universitet üçün yeni tədris korpusunun tikilməsi müzakirə olunurdu. Bu istiqamətdə hər hansı bir irəliləyiş varmı?

- Möhtərəm prezident İlham Əliyev cənab Elxan Hüseynovun SDU-nun rektoru təyin olunması barədə sərəncam verdikdən sonra Elxan müəllimi qəbul edib. Cənab prezident deyib ki, bilirəm ki, bir neçə aydır Sumqayıt Dövlət Universitetində rektorəvəzi kimi fəaliyyət göstərirsən. Və soruşub ki, həmin universitetin hansı problemləri var? Prezident qeyd edib ki, mənim üçün Sumqayıtın, eləcə də SDU-nun inkişafı olduqca vacibdir, istərdim ki, bu universitet Bakıdakı universitetlərə bərabər, ölkəmizin aparıcı universiteti kimi təhsil versin. Dövlət başçısı deyib ki, universitetin maddi-texniki bazasının, infrastrukturunun möhkəmləndirilməsi baxımından nə lazımdırsa, mən sizə kömək edə bilərəm. Orada hörmətli rektorumuz möhtərəm prezidentə məruzə edib ki, SDU-nun binası 1971-ci ildə tikilən binadır və bu günün tələblərinə qətiyyən cavab vermir, kontingentimiz artır. Binanın tutumu, maddi-texniki bazası isə tələbatdan aşağıdır. Rektorumuz cənab prezidentdən yeni tədris binasının tikilməsinə yardım göstərməsini xahiş edib. Səhv etmirəmsə, cənab nazir də orada olub. Dövlət başçısı elə yerindəcə göstəriş verib ki, bu yeni korpus tezliklə tikilməlidir.

Sonra cənab nazir Mikayıl Cabbarov universitetimizdə olarkən universitetin ərazisini tamamilə gəzdi, bütün mərtəbələrə baxdı, hətta zirzəminin vəziyyəti ilə tanış oldu və doğrudan da binanın müasir tələblərə cavab vermədiyini gördü və möhtərəm prezidentin tapşırığına uyğun olaraq tədbirlər görüləcəyini bildirdi.

Nazirliyin artıq yeni tədris binası ilə bağlı layihəsi hazırdır, bu layihə kollektivimizin də müzakirəsinə verilib, biz də baxıb təkliflərimizi vermişik. Yəqin ki, növbəti tədris ilindən etibarən yeni tədris korpusunun tikintisiə başlanılacaq.

- Dediniz ki, layihəni artıq görmüsünüz. Orada hansı üstünlüklər, yeniliklər var idi?

- Yeni layihə, yeni bina Avropanın ən yaxşı kampus sistemlərinə uyğun bir sistemdir. Hansı ki, orada müasir tədris binaları var. Bu kampus ən azı 10 minlik tələbə üçün nəzərdə tutlub. Nəzərə alın ki, bu gün 4 mindən bir az artıq tələbəmiz var. Ola bilsin ki, hətta 15 minlik bir kampus olsun. Həmin sistemdə auditoriyalarla yanaşı müasir idman zallarının, idman meydançasının, muzeylərin, mərkəzlərin, su hövzəsinin, avtodayanacağın olması nəzərdə tutulur. Universitetimizin ərazisi 9 hektardan artıqdır. Bu, çox böyük ərazidir və bu ərazi belə bir kompusun yaradılmasına imkan verir.

- İstərdim, bir qədər də qəbul planı barədə danışaq. Ötən il və bu il üçün nə dəyişikliklər var?

- Ötən ilə qədər bizdə 7 fakültədə 26 ixtisas üzrə qəbul aparılırdı. Bu il isə bizə 10-dan artıq yeni ixtisas verildi. SDU-da rus sektoru yox idi, bu ildən isə bir neçə ixtisas üzrə rus bölməsinə qəbul aparılacaq.

Eyni zamanda, məktəbəqədər tərbiyə, ibtidai sinif və xarici dil müəllimliyi, kimya və biologiya müəllimliyi ixtisasları da universitetimizdə bu ildən olacaq.

- Bəs tələbə qəbulunda say baxımından hansı dəyişikliklər var?

- Bu ixtisas artımı təbii ki, həm də yeni tələbə kontingenti deməkdir. Ötən ilə qədər təxminən 1000 nəfər qəbul olunurdusa, bu ildən bu rəqəm 1300-dən artıq olacaq.

İndiki halda, müəllim-professor kontingentinin də artırılması zərurətini hiss edirik. Cənab Elxan Hüseynovun təşəbbüsü ilə Universitetimizə elmi dərəcəsi, elmi adı olan mütəxəsislər dəvət olunub və işə qəbul olunublar. Fürsətdən istifadə edərək, elmi dərəcəsi, elmi adı olan kadrları, savadlı və peşəkar mütəxəsisləri işə dəvət edirik.

- Universitetin məzunları ölkəmizdə yerləşən neft-kimya müəssisələrinin tələblərinə cavab verə bilmir. Hətta ötən yaxın illərdə “Azərikimya” İstehsalat Birliyi iş üçün müraciət edən SDU-nun tələbələrinin onların tələblərindən çox aşağı biliyə sahib olduğunu bildirmişdi. Son dövrlərdə praktik bilik və bacarıqların mənimsədilməsi üçün “Azərikimya” ilə hər hansı əməkdaşlıq qurulubmu?

- ARDNŞ təmsilçilərinin o mülahizələri ilə müəyyən qədər razılaşmaq olar. Niyə görə? Əvvəlcə, deyim ki, yarandığı gündən bizim təhsil ocağında nəinki ölkəmizdə, hətta SSRİ-də və dünyada tanınan alimlər, professorlar çalışıb. O ənənə bu gün də var. Yəni kadr hazırlığını yüksək səviyyədə aparmaq üçün müəllim-professor heyətimiz var. Onların bilik və kadr hazırlamaq qabiliyyətinə heç vaxt heç kimin şübhəsi olmayıb, ola da bilməz. İnanmıram ki, ARDNŞ də müəllim-professor heyətimizin peşəkarlığına və bacarığına şübhə ilə yanaşır. Sadəcə, görünür, əvvəlki rəhbərliyin dövründəki bəzi neqativ hallar nəzərdə tutulurmuş. Bu gün də qarşımızda duran əsas məqsəd odur ki, yüksək ixtisaslı, bacarıqlı kadrlar hazırlayaq ki, universitetimiz haqqında bu cür fikirlər səsləndirilməsin. Əməkdaşlığa gəlincə isə şəhərimizin digər təşkilatları ilə olduğu kimi “Azərikimya” ilə də sıx əlaqələrimiz var, qarşılıqlı əlaqədə işləyirik. Birliyin Müşahidə Şurasının sədri Muxtar Babayevə də minnətdarıq ki, tələbələrimizin onların istehsalat müəssisələrində təcrübə keçmələri üçün şərait yaradır. Artıq eşidirik ki, Birlik rəhbərliyinin bizim tələbələrimiz haqqında müsbət fikirləri var və gələcəkdə onların işə qəbulu da gözləniləndir.(168saat.com)