S. Vurğun adına Mərkəzi Kitabxanada Mərkəzləşdirilmiş Kitabxana Sisteminin 2015-ci ilin yekunlarına və qarşıda duran vəzifələrə həsr olunmuş seminar- müşavirə keçirilmişdir. MKS kollektivinin birgə iştirakı ilə keçirilən yığıncağı MKS-nin direktoru Yeganə Əhmədova açaraq qeyd etdi ki, tarixə qatılan 2015-ci il MKS-in kollektivi və çoxsaylı oxucuları üçün "MÜTALİƏ İLİ” olaraq yadda qaldı. Seminar-müşavirədə əsas göstəricilər təhlil edildi, il ərzində görülən işlər, keçirilən tədbirlər müzakirə olundu, il boyu keçirilən maraqlı, məzmunlu tədbirlərdən hazırlanmış slayd izlənildi, 2016-cı ildə qarşıda duran vəzifələrdən danışıldı.
Yığıncaqda MKS-nin direktor müavini Gülnaz Səfərova MKS-nin 2016-cı il üçün tərtib olunmuş planı, "Multikulturalizm ili”, "Uşaq ədəbiyyatı ili”ndə tədbirlərin keçirilməsinin məqsəd və vəzifələri və kitabxanalar qarşısında duran vəzifələr haqqında, S. Vurğun adına Mərkəzi kitabxananın elmi katibi Pərvanə Oasımova illik hesabatın təhlili ilə bağlı çıxış etdilər. Həmçinin, kitabxana filialların plan və hesabatlarına ayrı-ayrılıqda nəzər salındı, müsbət cəhətləri, nöqsanları göstərildi, qeydlər, iradlar bildirildi. 
Sumqayıt şəhər MKS-də ilin yekunları müzakirə olunarkən il ərzində işində fərqlənən kollektivlərin və əməkdaşların mükafatlandırılması ənənəsi bi il də davam etdirildi. Belə ki, Sumqayıt şəhər Mədəniyyət və Turizm İdarəsi, Sumqayıt şəhər Mərkəzləşdirilmiş Kitabxana Sistemi və Mədəniyyət İşçiləri Müstəqil Həmkarlar İttifaqı Sumqayıt şəhər Komitəsi tərəfindən il boyu işində fərqlənən Mərkəzi Uşaq Kitabxanası "İlin ən yaxşı kitabxanası”, N. Gəncəvi adına Kitabxana Klubun kitabxanaçısı Lazımova Bəturə "İlin ən yaxşı kitabxanaçısı”, S. Vurğun adına Mərkəzi Kitabxananın baş biblioqrafı Cəfərova Nazxanım "İlin biblioqrafı” nominasiyalarına görə fəxri fərman və hədiyyələrlə mükafatlandırıldı. 
Sonda Metodika-biblioqrafiya şöbəsinin böyük metodisti Natəvan Axundzadə "Fövqəladə hallar zamanı kitabxanaçıların qarşısında duran vəzifələr” haqqında, yanğın təhlükəsi zamanı davranış qaydaları haqqında məlumat verdi.