Keçən il mayın 21-də Sumqayıtda 10 yaşında məktəblini şəxsi avtomabili ilə vuraraq ölümcül hala salan Türkiyə vətəndaşı Arikan Mehmetin məhkəməyə gəlməməsinin səbəbi yerini dəqiq bildirməməsidir”.
Bu sözləri açıqlamasında Sumqayıt Apellyasiya Məhkəməsinin icraçı katibi Bəbir Əliyev deyib. O qeyd edib ki, Sumqayıtda "Yaşıl dərə” ərazisindəki evlər qeydiyyatda olmadığı üçün onun harada yaşadığı bilinmir.

"Özü də 20 telefon işlədir. Nömrələrinə zəng çatmır. Ona görə 2 çağırış məhkəmədə iştirak etməyib. Amma sahə rəisinə məlumat verilib ki, aprelin 13-də keçiriləcək məhkəmə iclasına gətirilsin”.

Türkiyə vətəndaşının birinci instansiya məhkəməsində verilən qərarı yerinə yetirməməsi məsələsinə isə belə aydınlıq gətirib.

"Qayda belədir ki, birinci instansiya məhkəsinin hökmündən şikayət və ya protest verilibsə, məhkəmə hökmündə göstərilən cəza Apellyasiya və ya Ali Məhkəmədə baxılıb qurtalana qədər icra edilmir. Şikayətə baxılıb qurtarandan sonra cəza qanuni qüvvəsinə minmiş hesab edilir. Birinci instansiya məhkəməsindən 20 gün ərzində şikayət etmə müddəti var ki, zərərçəkmiş bundan istifadə edib və şikayət verib. Zərərçəkmiş şikayət verdiyi üçün cəza icra edilmir.

Məhkəmənin icra katibi zərərçəkmiş tələblərini açıqlayıb.

"Şikayətçi ağır cəza təyin edilməsini və 4400 manat pul tələb edir. Məhkəmənin qərarı nə olacaq bəlli deyil. Bu həmin iclas zamanı məlum olacaq”.

Keçən il mayın 21-də Türkiyə vətəndaşı Arikan Mehmet Sumqayıtda 10 yaşlı məktəblini şəxsi avtomabili ilə vuraraq ölümcül hala salıb. Zərərçəkmiş məktəbli Mərdan Mərdanovun valideynləri bildirir ki, Arikan Mehmet tərəfindən törədilən qəza uşağı elə hala salıb ki, o, normal yeriyə bilmir. Mərdan Mərdanov 22 gün Sumqayıt Travmatologiya Xəstəxanasında yatıb.

Sürücü məktəblinin müalicəsi üçün hətta Türkiyədə kömək göstərəcəyi barədə vədlər versə də, sonradan bu vədlərin arxasından çəkilib.

Şikayətdə bildirilir ki, nə xəstəxanada olarkən, nə də sonra ailəyə yardım edilib.Müstəntiqlə ekspert birgə videogörüntüyə baxaraq rəy veriblər ki, xarici vətəndaş bu məsələdə təqsirkardır. Buna əsasən İlqar Məmmədov Aslan oğlunun hakimliyi ilə onun məhkəməsi olub. 13 yanvar 2016-ci ildə keçirilən məhkəmədə hakimin qərarı ilə təqsirkar şəxs sürücülük hüququndan məhrum olunmaq və qazancından dövlətə 20 faiz pul tutulmaqla 1 il müddətinə islah işləri cəzasına məhkum edilib.

Qərar qəbul edildiyi gündən bu vaxta qədər isə zərərçəkən tərəfə heç bir vəsait ödənilməyib.
Nəticədə zərərçəkən tərəf Sumqayıt Məhkəməsindən apellyasiya şikayəti verib. Lakin Apellyasiya Məhkəməsinin Fərmayıl Zeynalın sədrliyilə ilə keçirilən 2 çağırışına Arikan Mehmet gəlməyib.

3-cü çağırış isə aprelin 13-də keçiriləcək.Qəzada ayaq nahiyəsindən yaralanan Mərdan Mərdanov bu səbəbdən məktəbə gedə bilmir.(Modern.az)