II qrup Qarabağ əlili Zaur Həsənov bu gün səhər saat 11-də Respublika Həmkar İttifaqları Konfederasiyasının binası qarşısında özünü yandırdı. Biz hadisə yerinə çatanda ətrafdakılar onu bürüyən alovu söndürsələr də Qarabağ əlili ağır yanıq xəsarətləri almışdı. Saat 11.15-də hadisə yerinə təcili tibbi yardım maşını gəldi. Zaur Həsənovun Kliniki Tibbi Mərkəzin yanıq şöbəsinə yerləşdiyi bildirlir.
Qeyd edək ki, Qarabağ əlilinin mülkiyyət hüquqları Həmkarlar İttifaqı tərəfindən ciddi şəkildə pozulub. Onun özü təxminən 3 ay əvvəl "Bizim Yol"a məlumat vermişdi: “Vaxtı ilə eks-prezident Heydər Əliyev tərəfindən Qarabağ əlillərinin yaşayışlarının yaxşılaşdırılması məqsədi ilə dəniz kənarında mənə torpaq sahəsi verilmişdi. Həmin torpaqla bağlı Həmkarlar İttifaqı tərəfindən 2010-cu ildə məhkəməyə verildim və yerim əlimdən alındı. Məhkəmənin qərarından sonra hər yerə şikayət etməyimə baxmayaraq boş-boş sözlər və vədlərdən başqa bir cavab verilmədi”.
Zaur Həsənov torpaq sahəsində yerləşən obyektinin yeganə gəlir mənbəyi olduğunu bildirirdi: “Özümü yandırmağımla bağlı verdiyim qərar qətidir. Evim bankda girovdadır və satışa çıxarılıb. Bankdan pul götürüb obyektə sərmayə qoydum. Həmkarlar İttifaqının rəhbəri, millət vəkili Səttar Mehbalıyev əlimdən aldı. Ona görə də Həmkarlar İttifaqının qarşısında özümü yandıracam”.
Xəbərdən istifadə edərkən istinad etmək vacibdir.
