Ölkədə ilk dəfə olaraq yollardakı asfalt örtüyünün keyfiyyətinin müəyyən edilməsi təcrübəsi həyata keçiriləcək. Bu məqsədlə laboratoriya yaradılıb ki, bu laboratoriya ən müasir avadanliqlarla təchiz olunub.

ANS TV-nin məlumatın görə, təzə çəkilən yolun bir neçə aya dağıldığının, ya da qabararaq çökdüyünün dəfələrlə şahidi olmuşuq. Kimi bunu yolun yatağının yaxşı möhkəmləndirilməməsilə, kimi də asfalt-beton qarışığının tərkibindəki materiallardakı çatşmazlıqlarla əlaqələndirir. Yolların əsasən ağırtonnajlı yük maşınlarına tab gətirməyib sıradan çıxması isə hər kəsə bəllidir. Bu günədək yolun keyfiyyətini müəyyən edən xüsusi cihaz olmadığından Respublika Stanartlaşdırma Metrologiya və Patent üzrə Dövlət Komitəsi bir ilkə imza atıb. Komitənin Təcrübə Sınaq Mərkəzi asfaltın sınağı üzrə səyyar laboratoriya yaradıb və onu xarici ölkələrdən gətirilən ən müasir avadanlıqlarla təchiz edib.

Almaniyadan alınan bu xüsusi qurğu xüsusilə asfaltın fundamentinin nə qədər keyfiyyətli olub -olmadığını üzə çıxarır. Eyni zamanda, müxtəlif tutumlu avtomobillərin ona göstərdiyi təzyiqi, təsir etdiyi yük də aşkarlayır.

Qurğu isə çəkilən asfaltın möhkəmliyi, sıxlığı, nəmliyi və məsaməliliyini bir dəqiqə ərzində müəyyən etməyə imkan verir. Səyyar laboratoriya asfalt-beton qarşığında istifadə olunan materialların yəni bitum, qırma, daş, çınqıl və mineral tozun da nə dərəcədə keyfiyyətli olduğunu ortaya çıxarır.

Komitənin Sumqayıtda daha da təkmilləşdirilən, ölkədə ilk dəfədir ki, neft və neft məhsullarının sınağını həyata keçirən laboratoriya da bir sıra yenilikləri təcrübədən keçirib.

Bir sözlə hər iki laboratoriya keyfiyyətli işə xidmət edəcək, istehsal prosesində qüsurlara yol verənlərsə, qaydalara uyğun olaraq cəzalandırılacaq.