Son vaxtlar Sumqayıt şəhərində gündüz vaxtı küçə işıqlarının qoşulu qalması hallarına rast gəlinir. Ölkənin bəzi yerlərində işıq probleminin hələ də öz həllini tapmadığını nəzərə alsaq, bu cür halların baş verməsi həm elektrik enerjisinin əbəs yerə sərf edilməsi, həm də ehtiyac olmadan istifadəsi anlamına gətirib çıxarır.

Məsələyə aydınlıq gətirmək üçün Sumqayıt Şəhər Küçə İşıqları idarəsi ilə əlaqə saxladıq. İdarənin rəis müavini İlqar Mahmudov LiderXəbər-ə açıqlamasında bunları dedi:

"Sumqayıt şəhərində küçə işıqları avtomat rejimdə işləyir. Yəni gündüzlər sönür, gecələr yanır. Amma proflatika işləri istisna olmaqla. Küçə işıqlarının yeraltı kabel xətlərində problem yarananda, təmir işləri gedəndə işıqlar qoşulu olur ki, bu da gərginliyin yoxlanılması, gedib-getməməsi, neçə volt olması, lampaların işləyib-işləməməsini aşkar etmək üçündür”.