Azərbaycan Respublikası Prezident Administrasiyasının qarşısında özünü yandıran Sumqayıt şəhər sakinləri ilə bağlı Sumqayıt şəhər İcra hakimiyyətindən Xeberle.com-a bildirilib ki, özünü yandıran Salahov Elçin Əlimurad oğlu bacanağı Babayev Abuzər Baba oğlundan 2006-cı ildə fərdi evin bir hissəsini almışdır. Evi satan Babayev Abuzərin qardaş və bacısı alqı-satqıdan xəbərsiz olduqlarını bildirərək məhkəməyə müraciət etmiş və alqı-satqı müqaviləsi ləğv edilmişdir. Qohumlar arasında davam edən münaqişə zamanı Elçin Salahov yalnız öz bacanağından ödədiyi məbləği aldıqdan sonra evi tərk edəcəyini bildirmişdir. Məsələ ilə bağlı heç bir ev söküntüsü faktı mövcud deyil. Qohumlar arasında olan mübahisə məhkəmə araşdırması predmeti olduğundan Sumqayıt şəhər İcra Hakimiyyətinə bununla bağlı heç bir müraciət daxil olmamışdır. Hal-hazırda məhkəmə prosesi davam edir.