Ali məktəblərin magistratura pilləsinə qəbul olan gənclərə hərbi xidmətdən möhlət verilməsi təklifi  gündəmdə olsa da, məsələ hələ ki açıq qalır.  Milli Məclisin Müdafiə və Təhlükəsizlik Komitəsinin üzvü Zahid Oruc Modern.az-a açıqlamasında  məsələnin nəticəsiz qalacağını bildirib. 

“2008-ci ildən həmin hüquqlar ləğv edildi. Yalnız bakalavr pilləsində təhsil alanlara möhlət verilir. Məsələ ondadır ki, hazırda müxtəlif universitetlərin rəhbərlərinin parlament üzvü olması, bizə imkan verir ki, statistikaya nəzər yetirə  bilək. Araşdırmalar onu göstərir ki, aspirantura və ya magistratura pilləsindən sonra elmi müdafiələrə ayrılmış və gələcəkdə bu yöndə öz işlərini davam etdirmək istəyənlərin 80 faizi xanımlardır. Orta məktəblərimizin bir çox müəllimləri də qadın olduğundan, biz dəfələrlə qeyd etmişik ki,  bu hallar mənəvi-psixoloji cəhətdən oğlan uşaqlarının böyüməsinə, onlarda kişi simasının formalaşmasına çətinlik yaradır. “Elm haqqında” qanun layihəsində magistrlərə hərbi xidmətdən möhlət hüququnun verilməsi ilə bağlı müddəa nəzərdə tutulub. Amma layihə artıq 2 sessiyadır ki, parlamentin müzakirəsinə çıxarıla bilmir. Mən bunu təəssüflə qarşılayıram. 
Açığı Şəmsəddin Hacıyevin bu məsələyə  çox narahatlıqla, həmçinin milli mənafeləri düşünərək, yanaşdığının şahidiyəm. Lakin hansısa səbəblərdən, deyə bilmərəm bu məsələlərə təsir var. Onları təyin etmək çox çətindir. O səbədən bu müzakirələr baş tutmur. Odur ki, indiki sessiyamızın gündəliyində həmin məsələ nəzərdə tutulmayıb. Elə də nikbin deyiləm ki, gələn yaz sessiyasında o məsələ müzakirə olunacaq. Birmənalı bilmək lazımdır ki, alimlərimiz yaşca kifayət qədər yuxarı yaşı təmsil edirlər. Onların böyük bir hissəsi qocalıblar. Alimin gəncləşməsi prosesinin elmdə fasiləsizliyin təminatı ancaq bundan asılıdır. Ona görə də, mən məsələnin həllinin birmənalı tərəfindəyəm. Magistratura tələbələrinin 50 fazini oğlanlar təşkil edir. Onların əksəriyyəti elmi müdafiəyə çıxa bilmirlər. Belə olduğu təqdirdə möhlət hüququnun verilməsi heç bir halda ordunun sıra sayının azalmasına, çağırışda ciddi əngəllərin yaranmasına təsir göstərə bilməz. Şükürlər olsun ki, Azərbaycan demoqrafik cəhətdən artan millətlər sırasındadır”.

Deputat Əhməd Vəliyev də həmkarı ilə eyni fikirdədir. “Bu barədə indiyə qədər çox təkliflər  irəli sürmüşük ki, gənclər  elmi potensialın formalaşması naminə  hərbi xidmətdən azad olunsalar, daha yaxşı olar. Bu gün təhsil müəssisələrinin ən böyük problemi kadr problemidir. Kadrın formalaşması üçün bakalavr təhsilli gənclərin aspiranturanı, doktoranturanı bitirməsi vacibdir. Ancaq o şəkildə işlə təmin oluna bilərlər. Bu nöqteyi-nəzərdən biz düşünürük ki, magistraturada, hətta doktoranturada gənclərin hərbi xidmətdən azad olunması daha məqsədə müvafiqdir. Lakin məsələnin yaxın zamanlarda həll olunacağını deyə bilmərəm”.