Sumqayıtda Sülh prospektinin 36-cı məhəllə yerləşən hissəsində binalarda aparılan şüşə konstruksiyalı fasadlaşma işləri vətəndaşları eyvansız qoya bilər.

Bu barədə “Qafqazinfo”ya sakinlər məlumat verib. Xəbərdə bildirilir ki, binanın fasadlanması hazır olduqdan sonra eyvanların ölçüləri nəzərə çarpacaq dərəcədə kiçiləcək. Binanın 4-cü mərtəbəsinə qədər olan eyvanların eni 70 sm, 5-ci mərtəbədəki eyvanlar isə 60 sm olacaq. Bu isə sakinlərin ciddi narazılığına səbəb olub. Sakinlər bildirir ki, tikinti aparan şirkət və səlahiyyətli şəxslər mənzillərin eyvanlarının “kupça”ya daxil edilmədiyini əsas gətirirlər.

Sözügedən binalar 1964-cü ildə tikilərək əhalinin istifadəsinə verilib. Şikayətçilər deyir ki, onsuz da darısqal və yaşamaq üçün minimal tələblərə belə cavab verməyən bu binalarda vətəndaşların mülkiyyət hüququ pozularaq, onalarla razılaşdırılmadan eyvanlar sökülərək kiçik ölçülü eyvanlarla əvəz edilir. Hətta bir sakinin eyvanı tamamilə təxirə salınıb: “Ən dəhşətli mənzərələrdən biri isə odur ki, həmi məhəllədə yerləşən 5/11 və 6/11 binalar bitişik olduğu halda yalnız 5/11 nömrəli binada fasadlama işləri aparılır. Çünki, gələn qonaqlar və ölkə rəhbərliyi buradan keçəndə əsasən 5/11 görsənir, 6/11 görsənmədiyindən bu bina elə köhnə görünüşündə qalır”.

Qeyd olunur ki, binanın şüşədən olacaq yeni görünüşlü dizaynı hazırlanan zaman vətəndaşların rahatlığı nəzərə alınmayıb. Bunun məsuliyyəti isə birbaşa Bakı Dövlət Layihə İnstitutunun üzərinə düşür. Sakinlər onu da bildirir ki, İlqar İsbatovun verdiyi bu dizayn yaşayış binasından çox administrativ, inzibati binalara uyğun gəlir:  “Bakı Dövlət Layihə İnstitutunun direktoru əməkdar memar İlqar İsbatovun qəbuluna düşmək isə mümkün deyil. İnstitutun direktor müavini Şakir Eyvazov Daşınmaz Əmlakın Texniki Pasportunda göstərilərək vətəndaşın mülkiyyəti hesab edilən bu eyvanların sökülməsi məsələsində aciz qalaraq sualları cavablandırmaqdan yayınır.

Binalar fasadlanan zaman yaşayış və qeyri yaşayış binalarının mövcud durumu nəzərə alınmalıdır. Cənab Preziden İlham Əliyev dönə-dönə vurğulayır ki, abadlıq işləri aparılan və ya Döblət Proqramları icra olunan zaman heç bir vətəndaş incidilməməli və onun Konstitusiyon hüquqları məhdudlaşdırılmamalıdır. Əminliklə deyə bilərik ki, cənab Prezidenin bu yalançı abadlaşma və fasadlama əməliyyatlarından xəbəri yoxdur. Dövlətin yenidənqurma və tikinti işlərinə ayırdığı milyonlarla vəsaiti İlqar İsbatov kimi səlahiyyətli şəxslər fasadlama əməliyyatları ilə göyə sovurur.  Azərbaycan Respublikasının vətəndaşının mülkiyyəti Konstitusiya ilə qorunur. Bu barədə Konstitusiyanın 13 və 29-cu maddələrində açıq aydın yazılıb. Müvafiq olaraq burada göstərilir: “... mülkiyyət toxunulmazdır və dövlət tərəfindən müdafiə olunur” və “Hər kəsin mülkiyyət hüququ vardır. Heç kəs məhkəmənin qərarı olmadan mülkiyyətindən məhrum edilə bilməz. Əmlakın tam müsadirəsinə yol verilmir. Dövlət ehtiyacları üçün mülkiyyətin özgəninkiləşdirilməsinə yalnız qabaqcadan onun dəyərini ədalətli ödəmək şərti ilə yol verilə bilər”.