Azərbaycanın Xalq artisti Muxtar Maniyev dünyasını dəyişib.
Bu barədə onun ailə üzvləri məlumat verib.
Bildirilib ki, aktyorla vida mərasimi bu gün saat 14:00-da Təzə Pir Məscidində baş tutacaq. Dəfn mərasimi isə Qala kəndində olacaq.
Qeyd edək ki, aktyor şəkərli diabet xəstəliyindən əziyyət çəkirdi. Ötən il aktyorun hər iki ayağı amputasiya edilmişdi.
Muxtar Maniyev 1935-ci ildə Bakıda doğulub. Xalq artistinin kinoya gəlişi "Onu bağışlamaq olarmı?" filmi ilə başlayıb. Çox keçmədən ardınca "Koroğlu" filminə çəkilib. Kinorejissor Hüseyn Seyidzadə bu filmə aktyor axtarışı üçün instituta gələndə, Muxtarı elə ilk baxışdan gözü tutub və onu dəmirçi oğlu Polad rolunda çəkib. O vaxt Muxtar Maniyev hələ birinci kursda oxuyurdu. Bu möhtəşəm qəhrəmanlıq dastanında ona həvalə edilən Poladın obrazı haqqında o vaxt tənqidçilər də müsbət fikir söyləmişdilər. Deyirdilər ki, kinoya yeni nəfəs, yeni ampluada aktyor gəlib. Sonrakı illər bir-birinin ardınca "İnsan məskən salır", "O qızı tapın", "Bizim Cəbiş müəllim" filmlərində Muxtar çox uğurlu qəhrəmanları ekranda canlandırmaqla özünü təsdiq edib.
Allah rəhmət eləsin!(AzVision.az)
Xəbərdən istifadə edərkən istinad etmək vacibdir.
