Ömrünün 64-cü qışını yaşayır əməkdar jurnalist, media kapitanlarından biri, yazıçı, ssenarist, əsl sumqayıtlı Eyruz Məmmədov. Cəsarətlə demək olar ki, o, ömrünün bütün fəsillərini doğma şəhərinə - Sumqayıta həsr edib.
E.Məmmədov 1953-cü ildə Bakı şəhərində anadan olub. Sonradan Sumqayıta köçür və bütün ömrünü "Gənclər şəhəri”nə həsr edir. İxtisasca jurnalist-filoloqdur. "Sumqayıtın əks-sədası” qəzetinin baş redaktorudur. Azərbaycana qarşı uzun illər Ermənistanda və Dağlıq Qarabağda, eləcə də Bakı və Sumqayıt kimi iri şəhərlərində törədilən erməni-daşnak təxribatlarının tədqiqi və ifşası yolunda 1988-ci ildən başlayaraq yorulmadan, vətənpərvər bir jurnalist məsuliyyəti ilə çalışan Eyruz Məmmədov yalnız yaşayıb-yaratdığı Sumqayıtda deyil, bütünlükdə respublikada və onun xaricində də yaxşı tanınır. Hələ ötən əsrin 90-cı illərində unudulmaz mərhum kinorejissoru Davud İmanovla birgə həyatlarını riskə ataraq işləyib-hazırladıqları, ermənipərəst Sovet rejiminə, daşnakların mənfur xristian həmrəyliyi ilə Qərb dövlətlərində ölkəmizə qarşı törətdikləri siyasi fitnələrinə, saysız təxribat və faciələrə kəskin etiraz, tutarlı cavab olan "Sumqayıtın əks-sədası” ("Exo Sumqaita”) sənədli filmi ilə xalqımızın ideoloji mübarizəsinin daim ön xəttində olub. Eyruz Məmmədov sonralar "Sumqayıtın əks-sədası” tammetrajlı, "Cəbhə bölgəsində”, "Sumqayıtın bir axşamı”, "Sumqayıtın əks-sədası-2” sənədli filmlərinin ssenarilərini yazıb. Sumqayıt hadisələrindən sonra ömrünün qalan hissəsini ekspert qismində bu olayların araşdırılmasına həsr edib. Qarabağ və erməni-daşnak mövzularını daim diqqət mərkəzində saxlayaraq, bu sahədə araşdırmalarını ardıcıl olaraq davam etdirməklə yanaşı Eyruz müəllim son illərdə ədəbi yaradıcılıqla da məşğul olur. O, "2-ci paralel”, "Anata”, "P.S", Dama Pika”, "Mister Riç” "28-dən 29-na keçən gecə”, "Sumqayıtım mənim”, "Bir, iki, üç... və yaxud Dağ çiçəyi”, "Gecə... İncə gecə”, "Zöhra və Kənan”və s. bədii və tarixi kitabların müəllifidir. Yazıçının rus, ingilis, alman, ispan və fransız dillərində nəşr olunmuş bir çox tarixi əhəmiyyətli əsərləri var. Həsən bəy Zərdabi adına və "Araz” ali ədəbi mükafatlarının laureatıdır.
Eyruz müəllimin böyüklüyü onun sadəliyində və səmimiliyindədir. Sumqayıtda hər kəs onu sevir və hörmətlə yanaşır. Saatlarla doymadan, yorulmadan onunla ünsiyyətdə olmuşuq. Heç zaman öz dəyərli tövsiyələrini, biliyini, təcrübəsini və dəstəyini biz gənclərdən əsirgəməyib.
Sumqayıtla bağlı yüzlərlə məqalə və müsahibəsi işıq üzü görüb. O, Sumqayıtı çox sevir. Bəlkə də canından çox. Şəhərimizin hər bir uğuruna öz uğuru kimi yanaşır. Sumqayıt demək olar ki, onun gözünün önündə böyüyüb boya başa çatıb. Müsahibələrinin birində Eyruz müəllim Sumqayıt haqqında belə danışır:

 

" Əvvəllər Sumqayıtın özünün bir çox adət-ənənələri var idi. Bu adət-ənənələr respublikanın digər regionlardakından dəfələrlə fərqlənirdi. Sumqayıtda bölgələrdən çox insanlar yaşadığına görə bütün adət-ənənələr bu şəhərdə daha da formalaşmışdı. Buna misal olaraq göstərmək olar ki, şəhər əhalisi tanımadığı Sumqayıt sakininə belə yardım edib, əl tuturdular. Sumqayıtda dövlət sturukturları tərəfindən həll olmayan hansısa məsələ Sumqayıt ağsaqqallarının bir sözü ilə həll olunurdu”.

Eyruz Məmmədovun sözlərinə görə, ilkin variantda Sumqayıtda 20 min insanın yaşaması nəzərdə tutulurdu.

"Kamran Hüseynov, Yəhya Məmmədovun və digər şəxslərin vasitəsilə Sumqayıtda 100-200 min insanın yaşamağı üçün şəraitin yaradılmağı həyata keçirildi. Baxmayaraq ki, o zaman bunun üçün çoxlu maneələrə rast gəlindi”.

Əməkdar jurnalist deyir ki, Sumqayıtın simvollarından biri də Nəsimi parkıdır.

"Bu park 50-ci illərdə şəhər sakinlərinin əlləri ilə salınıb. Hətta yadıma gəlir ki, 1980-ci ildə Sumqayıta bir dəstə turist gəlmişdi. Onlara deyəndə ki, bu park 20 il ərzində salınıb, buna inanmadılar. Onlar bizə deyirdilər ki, bura dəniz sahilində meşə zonası olub. Biz onları inandıra bildik ki, bu ağacları şəhər sakinləri bura əkiblər. Hətta prezident İlham Əliyev də Sumqayıta son səfəri zamanı Nəsimi parkının yanında yeni yaradılmış Bulvarın açılışı zamanı çıxış edərkən dedi ki, bu bulvarın yaradılması "möcüzədir”. Bu gün Sumqayıt əvvəlki şan-şöhrətin yenidən bərpa edib. Hiss olunur ki, şəhər sakinləri doğma şəhərlərinin bərpası üçün canlarını belə fəda edirlər”.

 

Şəxsiyyətinə böyük rəğbət bəslədiyim, gözəl insan, səmimi həmkar, gənclərin dostu, əsl ziyalı Eyruz müəllim 64 yaşına qədəm qoydu. İnanırıq ki, onun Azərbaycan uğrunda onun faydası, verəcəyi töhfələri, bar-bəhrəsi irəlidədir. Belə insanların qədrini bilməliyik. O şəhərinə, ölkəsinə - xalqına təmənnasız, bunun nəticəsini gözləməyən, güdməyən nadir vətəndaşlarımızdan biridir!

Eyruz müəllim, sizi Xeberle.com kollektivi adından səmimi qəlbdən təbrik edir, ən xoş arzularımı çatdırıram!

Elnur Ağayev
Xeberle.com

 

Xəbərdən istifadə edərkən istinad etmək vacibdir.