Azərbaycan inkişaf etdikcə, gənclərin cəmiyyətdəki fəallığı ön sıraya çıxır. Bu mənada Azərbaycan Respublikasının Prezidenti Yanında Gənclər Fondunun dəstək verdiyi layihələr biz gəncləri daha çox öyrənməyə, dünyagörüşümüzü artırmağa və beynəlxalq miqyasda ölkəmizi layiqincə təmsil etməyə sövq edir. Mən də bu gənclərdən biri olaraq, üzərimə düşən məsuliyyəti yaxşı dərk edirəm. Bir neçə ay öncə Turizm və Menecment Universiteti, Azərbaycan Turizm İnsitutu Məzunlar Asossiasiyasının (ATİMA), Nərimanov Rayon Gənclər və İdman İdarəsinin dəstəyi ilə elan olunan peşəkar bələdçi təliminə qatılmaq üçün müraciət etdim. Müsahibə mərhələsindən keçdikdən sonra ölkəm, vətənim adına çox ağır yükün altına girdiyimi anladım. Azərbaycan Turizminə xüsusi töhfələr verən müəllimlərin bizə keçdiyi dərslər günbəgün bizim bu sahəyə olan sevgimizi artırırdı. Xüsusilə, bələdçinin əcnəbi qonaqlar qarşısında ölkənin bir nümayəndəsi olması işin nə qədər çətin olduğunu göstərir. Müxtəlif mövzularda – mədəniyyət, incəsənət, tarix, coğrafiya, etnoqrafiya, ümumi turizm bilikləri, bələdçinin davranış qaydaları dərsləri düzgün istiqamət götürməyimizi şərtləndirdi. Layihənin əsas məqsədi ölkədə turizmin inkişafına xüsusi təkan verməkdi. Bu işdə müxtəlif dil bilən, geniş dünyagörüşünə malik gənclərin fəallığı ön sıraya çıxır. Biz gənclər də Azərbaycan Respublikasının Prezidenti Yanında Gənclər Fondunun dəstəyini dərindən dərk edərək, tədris olunan istiqamətlər üzrə biliklərimizi təkmilləşdirdik. İnşallah, ölkəmizə, vətənimizə peşəkar bələdçi olaraq xüsusi töhfələr verməyə çalışacağıq. Digər yandan, hazırda dünya bazarında neft qiymətlərinin kəskin ucuzlaşdığı dövrdə Azərbaycanda digər sahələrlə yanaşı, turizmin önəmi qabarıq hiss olunur. Belədə, biz gənclər ölkə turizminin inkişafına təkan verməklə yanaşı, vətənpərvər davranmalı, Azərbaycanımızın beynəlxalq miqyasda müsbət yöndə tanınmasını, ölkəmiz haqda məqsədli şəkildə formalaşdırılmış mənfi rəyləri müsbətə doğru dəyişməliyik. Təlim müddətində Əlixan Mürvətov, Balaş Maqsudbəyli, Səkinə Əsgərova və digər müəllimlərin tədris etdiyi mövzular, vətənimizi əcnəbilərə sevdirmək yönündə aşıladığı təlimatlar inkişafımıza çox güclü dəstək oldu. Azərbaycanın zəngin tarixi keçmişi, unikal memarlıq tikililəri, dünyaca məşhur Azərbaycan xalçaları, dulusçuluq sənəti, kəlağayı, çövkən oyunu, əsrarəngiz təbiətimiz və başqa bu kimi nümunələr Azərbaycanın dünyada məşhur turizm ölkəsinə çevrilməsini şərtləndirir. Biz də bu missiyanı layiqincə doğrultmağa çalışacağıq. Yekunda Azərbaycan Respublikasının Prezidenti Yanında Gənclər Fonduna, Nərimanov Rayon Gənclər və İdman İdarəsinə, Turizm və Menecment Universitetinə, Azərbaycan Turizm İnsitutu Məzunları Asossiasiyasına (ATİMA) təşəkkür edirik.
Vüsal Hacıyev
Sumqayıtlı peşəkar bələdçi, ərəbşünas
Xeberle.com
Xəbərdən istifadə edərkən istinad etmək vacibdir.
