Xəbər verdiyimiz kimi, "Təhsil haqqında” qanuna dəyişiklik edilir. Dəyişikliyə görə, universitetlərin nəzdində ödənişli hazırlıq kursları yaradılır və bu hazırlıq kursları vasitəsilə bakalavr pilləsinə imtahan vermədən qəbul həyata keçiriləcək.
Qanuna edilən dəyişiklik deputatlar və ictimaiyyət arasında böyük səs-küy yaradıb. İnsanlar bununla bağlı narazılıqlarını bildirirlər.
Məsələ ilə bağlı "Odlar Yurdu” Universitetinin rektoru, keçmiş deputat Əhməd Vəliyev də Modern.az-a açıqlama verib.
Ə. Vəliyev "Təhsil haqqında” qanuna ediləcək dəyişikliyi yaxşı istiqamətlərdə atılan addımlardan biri kimi qiymətləndirib.
"Mənə elə gəlir ki, bu barədə Təhsil Nazirliyi qərar verib. Bu çox düzgün qərardır. Çünki gənclər bir il müddətində universitetlərin nəzdində açılacaq hazırlıq kurslarında hazırlaşacaq və həmin istiqamət üzrə təhsillərini davam etdirə biləcəklər. Bundan yaxşı qərar ola bilməz. Orta məktəblərdə məktəbəqədər təhsil müəssisələri var. Bu da hazırlıq rolunu oynayır. "Təhsil haqqında” qanuna gözlənilən dəyişiklik də bunun yuxarı pilləsidir. Bu dəyişiklik təhsilimizin inkişafına yönəlib. Yaxşı təhsil almaq üçün baza olmalıdır. Burada da həmin bazanın təmin olunmasından söhbət gedir”.
Rektor bu dəyişikliyə qarşı çıxan deputatların düzgün fikirləşmədiyini deyib.
"Hazırlıq qruplarına tələbə qəbulunun test üsulu üzrə imtahanların nəticələrinə görə aparılması nəzərdə tutulduğu üçün bu qruplarda qəbul zamanı şəffaflıq tam təmin ediləcək. Hazırlıq qruplarında təhsil alanlar bir illik təhsil müddəti başa çatdıqdan sonra yalnız buraxılış imtahanlarını müvəffəqiyyətlə verdikdə ali məktəblərə daxil olmaq hüququ qazana biləcəklər. Ona görə də mən burada hər hansı bir neqativ halların olacağına inanmır”.
Xəbərdən istifadə edərkən istinad etmək vacibdir.
