Ölkə rəhbərliyinin göstəriş və fərmanları ilə böyük özəlləşdirmə prosesinə start verildiyi vaxtda dövlət büdcəsinin yükünün azaldılması üçün bir sıra qurumların da özəlləşdirilməsi gündəmə gəlir. Xüsusilə bazar iqtisadiyyatı dövründə təbii inhisarçı qurumların olması əlavə xərcləmələrə səbəb olur. Qurumların özəlləşməsi, nəticədə dövlətin ona müdaxilə etmək imkanının minimuma endirilməsi ləngiyir...
Bu barədə Modern.az-a danışan Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov deyib ki, bəzi qurumların özəlləşdirilməsi mütləqdir:
"İndiki vəziyyətdə əhalidən müəyyən xidmət haqqı yığan qurumlar özəlləşdirilməyə çıxarılmalıdır. Həmin qurumların özəlləşdirilməyə çıxarılması üçün proqram işlənilib hazırlanmalıdır. Tarif Şurası qiymət müəyyənləşdirib, həmin qurumlar da tarifə uyğun yığım həyata keçirməlidirlər. Əgər müvafiq vəsait yığılmırsa, bu, həmin qurumların "minus”udur. Zərərlə işləyib bir də dövlət büdcəsinə zərər vurular”.
V.Əhmədov hesab edir ki, əvvəlcə gəlirlərini öz hesabına təmin etmək iqtidarında olan qurumların siyahısı müəyyənləşməlidir:
"Bunlar "Azərsu” Açıq Səhmdar Cəmiyyəti, "Azərişıq” Qapalı Səhmdar Cəmiyyət, "Azərenerji” Açıq Səhmdar Cəmiyyəti, "Azəriqaz” İstehsalat Birliyi və s. ola bilər. Dövlət büdcəsinin qənaətli istifadə olunduğu bir vaxtda bu qurumlara dotasiya ayrılması zərərdir. Yalnız dövlət üçün əhəmiyyət kəsb edən strateji sahələr dövlətin xidmətində qala bilər. Qurumların bəziləri strateji əhəmiyyətli olduğu üçün onlara dotasiya verilir. Amma onların tikinti, xidmət və s. şirkətlərinin hamısı özəlləşdirilməli, qurum özü starteji əhəmiyyətli olduğu üçün dövlət nəzarətində saxlanılmalıdır”.
Xəbərdən istifadə edərkən istinad etmək vacibdir.
